पैशाचे सोंग करता येत नाही म्हणणाऱ्या अजित पवार यांना मस्ती, उद्धव ठाकरे यांचा आसूड

बीड, धाराशिव : कर्जमुक्तीचा विषय काढल्यावर लाडक्या बहि‍णींना ४५ हजार कोटी वर्षाला देतोय, असे  वक्तव्य करून तरुणाला झापणारे राज्याचे उपमुख्यमंत्री अजित पवार यांचा समाचार शिवसेना पक्षप्रमुख उद्धव ठाकरे यांनी घेतला. अजित पवार यांचे वक्तव्य म्हणजे मस्तीची भाषा आहे, अशा शब्दात उद्धव ठाकरे यांनी सुनावले. तसेच पैशाचे सोंग करता येत नाही या अजित पवार यांच्या वक्तव्यावरही ठाकरे यांनी निशाणा साधला. कोरोना काळात महाराष्ट्रातल्या उद्योगपतींनी आणि भाजपच्या आमदार खासदारांनी पीएम केअर फंडात अडीच लाख कोटी रुपयांची मदत दिली. त्या पीएम केअर फंडाचे पुढे काय झाले, पैशांच्या हिशेबाचे काय? सद्यस्थितीत ती माहितीही उपलब्ध होत नाही. त्यातीलच ५० हजार कोटी केंद्राने महाराष्ट्राला दिले तर शेतकरी कर्जमुक्त होईल. केंद्राकडून पीएम केअर फंडातसे पैसे आणा, असा सल्ला उद्धव ठाकरे यांनी दिला.