गोमुखातून अखंड वाहते पंचधारा, कमळजापूरच्या भवानी मातेबाबत आहे अनोखी मान्यता

देवीची मूर्ती आणि या ठिकाणचा इतिहास फार प्राचीन आहे. वर्ष 2002 मध्ये नवरात्रीच्या दरम्यान लोकांना त्या ठिकाणी देवीची मूर्ती सापडल्याचं सांगितलं जातं. ज्या ठिकाणी मूर्ती सापडली तो भाग एका डोंगरासारखा होता. डोंगरावर काही मुलं सायंकाळच्या वेळेला फिरायला जात. त्या मुलांना उत्सुकता लागली आणि त्यांनी त्या ठिकाणी शोध घेण्याचा प्रयत्न केला. तेव्हा या ठिकाणी मूर्ती आढळल्याचं सांगितलं जातं.

राजा रामदेवराय या राजाच्या काळामध्ये राज्यावर शत्रूंचं आक्रमण झालं. त्या काळामध्ये राजा रामदेवरायचा वध झाला. राजाचा मंत्री हेमाद्रिपंत होते. मंदिराचे बांधकाम राजवाड्याचे बांधकाम याकडे ते बारकाईने लक्ष द्यायचे. त्यांनी औरंगाबाद पासून साधारणपणे विदर्भाच्या शेवटच्या टोकापर्यंत शिवमंदिर आणि देवीची मंदिरे बांधली. केवळ एकट्या यवतमाळ जिल्ह्यात 44 मंदिरो असल्याचं जेष्ठ पत्रकार पद्माकर मलकापुरे सांगतात. ही मंदिरे काही पडक्या तर काही उद्ध्वस्त स्वरूपातही आहेत. परंतु सामान्यतः चंद्रपूर पर्यंत ही मंदिर आहेत, असंही ते सांगतात.

हेमाद्रीपंत हे शिवभक्त असल्यामुळे मूर्ती तर सापडली. परंतु त्याचा पूर्णपणे काही शोध घेण्यात आला नाही. या ठिकाणी एक गोमुख आहे ज्या ठिकाणाहून एक झराही वाहतो. त्याला लोक तीर्थक्षेत्र असं संबोधतात. कमळजादेवीचं हे तीर्थक्षेत्र असल्याची आख्यायिका आहे. या ठिकाणी सापडलेली मंदिरे अतिशय प्राचीन असून त्याचे संशोधन होणे गरजेचे असल्याचेही ज्येष्ठ पत्रकार पद्माकर मलकापुरे यांनी सांगितले.

मंदिराला लागूनच वेरुळा नदीकाठी अखंड वाहणारे पंच धारा गोमुख आहे. गोमुखाचे पाणी गंगेच्या पाण्या एवढेच पवित्र असल्याची भक्तांची श्रद्धा आहे. या पंचधारा गोमुखाची धार कड्क उन्हातही तेवढीच थंडगार असते. या गोमुखातून निघणाऱ्या पाण्याची चव गोड आहे. नवरात्रीत इथं यात्रा आयोजित केली जाते. हे ठिकाण यवतमाळ वासियांसह महाराष्ट्रातील अनेकांचे श्रद्धास्थान आहे.