दुर्गा देवीसोबत केदारनाथ दर्शन, वर्ध्यातील नवरात्रोत्सव मंडळाचा अप्रतिम देखावा, Video

मंडपाच्या बाहेर आकर्षक विद्युत रोषणाई करण्यात आली आहे. मंडपात प्रवेश करतानाच केदारनाथ येथील दृश्या प्रमाणे देखावा करण्यात आला आहे. मोठ्या प्रमाणात आर्टिफिशल कापसाचा वापर करून देखावा तयार करण्यात आला आहे. पार्वती मातेच्या रूपात दुर्गादेवी मोठ्या थाटात विराजमान आहे. देवीचा साज आणि सौंदर्य भाविकांच्या मनाला अतिशय प्रसन्न करणारं आहे. या ठिकाणी माळ जपताना ऋषी, महादेवाची पिंड आणि शिव लिंगावर फुलं अर्पण करताना गणपती बाप्पा दिसत आहेत. शिवलिंगाच्या बाजूला ऐटीत बसलेले नंदी देखील आहे.

मागच्या वर्षी मंडळात बळीराजा या विषयावर देखावा तयार केला होता. यंदा केदारनाथ येथील देखावा सादर करण्यात आलाय. मंडळ कार्यकर्त्यांना हा देखावा तयार करण्यासाठी 15 दिवसांचा कालावधी लागला. तसेच संपूर्ण मंडळ कार्यकर्त्यांनी अहोरात्र मेहनत घेऊन हा आकर्षक देखावा तयार केला आहे. वर्धेकरांना नवरात्र म्हणजे दिवाळीच वाटते असे मंडळ कार्यकर्ते आनंद अवथळे यांनी सांगितलं. आर्टिफिशियल कापूस वापरल्यामुळे भक्तांना थेट केदारनाथला जाऊन देवीचे आणि महादेवाचे दर्शन घेतल्यासारखाच आनंद मिळतोय.

आर्वी नाका येथील दुर्गा मंडळातील देवीची ही आकर्षक मूर्ती मूर्तिकार शिवाजी राऊत यांनी तयार केली आहे. नवरात्रीतील नऊ ही दिवस वेगवेगळे कार्यक्रम मंडळात आयोजित केले जात आहेत. दरवर्षी प्रमाणे यावर्षी देखील दररोज आई जगदंबेचे दर्शन तसेच येथील आकर्षक विद्युत रोषणाई आणि मंडपातील नेत्रदीपक थाट बघण्यासाठी भक्तांची मोठी गर्दी जमतेय.