शेतकऱ्याचा अनोखा छंद, जतन केली 100 ते 150 वर्षांपूर्वीची जुनी शेती अवजारे, पाहा Video

सातारा : घरातील जुन्या वस्तू शक्यतो अडगळीत पडतात आणि काही दिवसानंतर त्या भंगारत घातल्या जातात. मात्र, सातारा तालुक्यातील कोंडवे येथील एका शेतकऱ्याने 100 ते 150 वर्षांपूर्वीची जुनी शेतीचे अवजारे जतन करून ठेवले आहेत. शेतीत आधुनिक अवजारांचा वापर जसा वाढत गेला तशी जुनी अवजारे कालबाह्य होत गेली. या अवजारांची जागा आता नवीन आणि आधुनिक अवजारांनी घेतली आहे. त्यामुळे शेती करणे देखील अधिक सोपे झाले आहे मात्र रमेश गुजर यांनी ती कालबाह्य झालेली अवजारे फेकून न देता योग्य प्रकारे जतन केली आहेत.

सातारा तालुक्यातील कोंडवे येथील रमेश गुजर यांनी 100 ते 150 वर्षांपूर्वीची अवजारे नागरिकांना आणि युवा पिढीला पाहता यावी यासाठी घरामध्ये स्वतंत्र खोली करून ठेवली आहेत. नागरिक ही अवजारे पाहण्यासाठी मोठी गर्दी करतात आणि ही अवजारे पाहून गुजर यांचे कुतूहल देखील करतात. या अवजारांचा मागील काळात कसा वापर केला जायचा? याची नावे काय आहेत? याबद्दलची माहिती रमेश गुजर आणि त्यांची पत्नी येणाऱ्या जाणाऱ्या नागरिकांना, पर्यटकांना आणि युवा वर्गाला सांगत असतात.