Uddhav Thackeray : शिवसैनिक चुकीला माफी देतील पण...; वाकचौरेंच्या प्रवेशावेळी ठाकरेंचा शिंदे गटावर प्रहार

राजकारणात आपण पक्षांतरे पाहिली पण पक्ष संपवण्याचं कटकारस्थान करणारे राजकारणी आणि पक्ष आपण पहिल्यांदा पाहतो आहे. तुम्ही सर्व शिवसैनिक दिलदार आहात. चुकीला माफी देतात पण पापाला माफी नाही अशा शब्दात उद्धव ठाकरे यांनी प्रतिक्रिया दिली. मातोश्रीवर ठाकरे गटाची शिर्डी लोकसभा मतदारसंघाची आढावा बैठक पार पडली होती. त्यामध्ये  माजी खासदार भाऊसाहेब वाघचौरे यांना लोकसभेची उमेदवारी ठाकरे गटाकडून दिल्या जाण्याच्या मुद्द्यावर चर्चा झाल्याचं समजते.

शिवसेनेचा आवाज दिल्लीचं तख्त हालवल्या शिवाय राहणार नाही. राजकारणात श्रद्धा व सबुरी हवी मात्र आता जे दिल्लीत बसलेत त्यांना सबुरी अजिबात नाही. मी आता ज्यावेळी शिर्डीत येईन तेव्हा साईबाबांचे दर्शन तर घेईनच पण सभा ही घेऊ. माझं त्या गद्दारांना आवाहन आहे. निवडणुकीला सामोर जा असं म्हणत उद्धव ठाकरे यांनी विरोधकांना इशारासुद्धा दिला.

भाऊसाहेब वाकचौरे यांनी २००९मध्ये शिवसेनेकडून लढताना वाकचौरे यांनी रामदास आठवले यांचा पराभव केला होता. त्यानतंर शिवसेनेतून काँग्रेसमध्ये प्रवेश केलेल्या वाकचौरे यांना २०१४ च्या लोकसभेला पराभवाचा धक्का बसला होता. तर आता पुन्हा ठाकरेंच्या शिवसेनेत त्यांनी प्रवेश केला. २०२४ मध्ये ते ठाकरे गटाकडून लोकसभा निवडणूक लढवण्याची शक्यता आहे.