Elphinstone Bridge Demolition : मुंबईकरांना तुर्तास दिलासा, गणेशोत्सव काळात एल्फिस्टन पूल सुरूच राहणार, कधी होणार बंद?

गणेशोत्सव काळात मोठ्या प्रमाणावर वाहतूक कोंडी होण्याची शक्यता असल्याने तोपर्यंत पूल सुरू ठेवण्यात येणार आहे. अनंत चतुर्दशीनंतर तीन दिवसांनी, म्हणजे १० सप्टेंबर रोजी, हा पूल वाहतुकीसाठी बंद केला जाईल. त्यानंतर पाडकाम सुरू करून त्याच ठिकाणी डबलडेकर पूल आणि शिवडी-वरळी एलिव्हेटेड कनेक्टरसाठी आवश्यक रचना उभी करण्याचा सरकारचा मानस आहे. वाहतूक विभागाने यासंदर्भात अधिकृत घोषणा केली असून सुरक्षेच्या कारणास्तव पूल पाडण्याची गरज अधोरेखित केली आहे.

या पुलाच्या पाडकामाला सुरुवातीपासूनच स्थानिक रहिवासी व दुकानदारांनी विरोध केला होता. पाडकामासोबत काही इमारती देखील जमीनदोस्त होणार असल्याने रहिवाशांचा पुनर्वसनाचा प्रश्न अद्याप सोडवलेला नाही. त्यामुळे नवी तारीख जाहीर झाल्यानंतर परिसरातील नागरिक आक्रमक होण्याची शक्यता आहे.

एल्फिन्स्टन पूल मध्य आणि पश्चिम रेल्वेमार्गांना जोडणारा तसेच परळ आणि प्रभादेवी या भागांमधील पूर्व-पश्चिम दळणवळण सुलभ करणारा पूल आहे. परळहून दादर, लोअर परळ, वरळी, सिद्धिविनायक मंदिराकडे जाणाऱ्या तसेच प्रभादेवीहून लालबाग, शिवडी, परळ व्हिलेज या परिसरात जाणाऱ्या वाहनांसाठी हा पूल महत्त्वाचा आहे. त्यामुळे पूल बंद झाल्यानंतर दादर आणि करी रोड येथील उड्डाणपुलांवर वाहतुकीचा ताण मोठ्या प्रमाणावर वाढणार आहे.

नव्या पुलाच्या बांधकामासाठी किमान दोन वर्षांचा कालावधी लागणार असल्याचा अंदाज व्यक्त करण्यात आला आहे. त्यामुळे या दरम्यान प्रवाशांना व वाहनचालकांना पर्यायी मार्गांचा वापर करावा लागणार आहे. मुंबईसारख्या गर्दीच्या शहरात एका महत्त्वाच्या पुलाचा वाहतुकीसाठी बंद होणं म्हणजे मोठं आव्हान ठरणार आहे. मात्र, सुरक्षा आणि भविष्यातील सोयीच्या दृष्टीने हा निर्णय अत्यावश्यक असल्याचे अधिकाऱ्यांचे म्हणणे आहे.

एकूणच, एल्फिन्स्टन पूलाचे पाडकाम हा मुंबईतील वाहतुकीसाठी मोठा टप्पा ठरणार आहे. अल्पकालीन अडचणी असूनही नव्या पुलामुळे भविष्यातील वाहतूक अधिक सुरक्षित व सुलभ होण्याची अपेक्षा आहे.