Navi Mumbai : चोरीनंतर चोरांची अजब पळवाट; पोलिसांना चकवण्यासाठी रेल्वे रुळांवर....; नवी मुंबईतील प्रकार

सानपाडा येथे मागील महिन्यात एका बंद घरात चोरी झाली होती. चोरट्यांनी घरातील 21 तोळे सोन्याचे दागिने लंपास केले होते. चोरीनंतर संशय टाळण्यासाठी आरोपींनी स्वतःजवळ मोबाइल फोन न ठेवता वेगळी युक्ती आखली. स्टेशन परिसरात सीसीटीव्ही असल्याने दिसू नये म्हणून ते मध्यरात्री तीन वाजल्यापासून पहाटे साडेपाच वाजेपर्यंत रेल्वे रुळावर बसून राहिले.

तपासादरम्यान स्टेशनपर्यंत आरोपी आले मात्र ते पुढे कुठे गेले याचा मागमूस लागत नव्हता. गुन्हे शाखा कक्ष 1 च्या पथकाने प्रत्येक संशयास्पद हालचालीचा मागोवा घेतला. पहाटे पहिली लोकल पकडण्यासाठी रुळावरून आलेले काही संशयास्पद लोक पोलिसांच्या नजरेत भरले. अखेर तपास टिटवाळापर्यंत पोहोचला आणि सापळा रचून दोन्ही आरोपींना अटक करण्यात आली. या कारवाईत वरिष्ठ निरीक्षक तानाजी भगत यांच्यासह पोलिस पथकाने महत्त्वाची भूमिका बजावली.