बुलाती है मगर जाने का नही! 500 रुपयांत शरीरसंबंधाची डील पण लॉजवर घडतंय नको तेच, मुंबईत तरुणासोबत चौघींनी...

२३ सप्टेंबर रोजी सीएसएमटी रेल्वे स्थानकावर आलेल्या एका तरुणासोबत ब्लकमेलिंगचा प्रकार घडला आहे. तो रेल्वे स्थानकावर असताना एका महिलेनं त्याला शरीरसंबंध ठेवण्याची ऑफर दिली. केवळ ५०० रुपयांत हा सौदा ठरवण्यात आला. महिलेनं तरुणाचा विश्वास संपादन करून त्याला गिरगाव येथील एका लॉजवर घेऊन गेली. पण येथील रुममध्ये आधीपासूनच इतर तीन महिला उपस्थित होत्या. या चारही महिलांनी तरुणाला दमदाटी करत तसेच बदनामी करण्याची धमकी देत त्याच्याकडून तब्बल ३५ हजार रुपयांची लूट केली आहे.

हा प्रकार घडल्यानंतर तरुणाने व्ही पी रोड पोलीस ठाण्यात धाव घेतली. पोलिसांनी तरुणाच्या तक्रारीवरून गुन्हा दाखल केला. तसेच फसवणूक करणाऱ्या तीन महिलांना अटक केली. माजिदा नूर सरदार गाझी, रुपा विश्वनाथ दास, नसिम्मा जमान शेख असं अटक केलेल्या आरोपी महिलांची नावं आहेत. तिघींना न्यायालयात हजर केलं असता त्यांना दोन दिवसांची पोलीस कोठडी सुनावली आहे.

मिळालेल्या माहितीनुसार, ही घटना २३ सप्टेंबर रोजी घडली. घटनेच्या वेळी तक्रारदार तरुण सीएसएमटी रेल्वे स्थानकावर होता. यावेळी एका अनोळखी महिलेने त्याच्याशी संवाद साधला. शरीरसंबंध ठेवण्याचं आमिष दाखवलं. केवळ ५०० रुपयांमध्ये शरीरसंबंध ठेव, असं महिलेनं तक्रारदाराला सांगितलं. दोघांमध्ये तसा व्यवहार ठरला. पण हा सौदा तरुणाच्या अंगलट आला.

तरुण शरीरसंबंधासाठी राजी झाल्यानंतर आरोपी महिलेनं तक्रारदाराला टॅक्सीमध्ये बसवून पठ्ठे बापूराव मार्गावरील भारत भवन हॉटेलजवळील इमारतीमध्ये घेऊन गेली. त्या इमारतीच्या पहिल्या मजल्यावरील खोलीत नेल्यानंतर, ती महिला आणि तिच्यासोबत आणखी तीन महिलांनी खोलीत प्रवेश करून तक्रारदाराला धमकावले. त्याचे अश्लील व्हिडीओ काढत त्यांनी बदनामीची भीती दाखवली. तक्रारदाराच्या मोबाइलमधून २२ हजार ऑनलाइन ट्रान्सफर करून घेतले, तसेच १३ हजार रोख रक्कम जबरदस्तीने काढून घेतली. या प्रकारानंतर तक्रारदाराने पोलिसांत तक्रार केली असून, पोलिसांनी आरोपी महिलांना अटक केली आहे. घटनेचा पुढील तपास सुरू आहे.