वसईचा सत्यम गेला, पण शिवासारखा पाच लोकांच आयुष्य सुंदर करून गेला!

वसई : रस्ते अपघातात ‘मेंदूमृत’ (Brain Dead) झालेल्या वसईतील दिवाणमान येथील सत्यम संतोष दुबे (वय 24) या तरुणाने मृत्यूनंतरही पाच जणांना नवजीवन दिले आहे. त्याच्या कुटुंबीयांनी घेतलेला अवयवदानाचा निर्णय समाजासमोर मानवतेचा खरा आदर्श ठरला आहे. दिवाळीच्या दिवशी वापी येथे झालेल्या दुर्दैवी मोटारसायकल अपघातानंतर सत्यमला नालासोपाऱ्यातील रिद्धी विनायक हॉस्पिटलमध्ये दाखल करण्यात आले. मात्र उपचारादरम्यान डॉक्टरांनी त्याला 'मेंदूमृत' घोषित केले. त्या क्षणी दुबे कुटुंबावर दुःखाचा डोंगर कोसळला, परंतु त्यांनी विलक्षण धैर्य दाखवत समाजाला जीवनदायी संदेश दिला.