मुंबईत 19 वर्षीय तरुणाने संपवलं जीवन, शेजारच्या मुलीचाही जीव देण्याचा प्रयत्न, नक्की काय घडलं?

श्रवण विनोद शिंदे असं आत्महत्या करणाऱ्या तरुणाचे नाव आहे. तो पार्कसाईट पोलीस ठाण्याच्या हद्दीत आयआयटी मार्केट, महात्मा फुलेनगर परिसरात आपल्या कुटुंबासोबत राहतो. या घटनेनंतर त्याच्या शेजारी राहणाऱ्या एका १९ वर्षीय तरुणीने देखील आत्महत्येचा प्रयत्न केला. मात्र, पोलिसांच्या सतर्कतेमुळे तिचा जीव वाचला.

पार्कसाईट पोलीस ठाण्याच्या हद्दीतील आयआयटी मार्केट, महात्मा फुलेनगर येथे राहणारा श्रवण विनोद शिंदे (वय १९) याने शनिवारी दुपारी २.३० वाजता आपल्या राहत्या घरी साडीच्या सहाय्याने लोखंडी अँगलला गळफास घेऊन आत्महत्या केली. त्याला तातडीने राजावाडी रुग्णालयात दाखल करण्यात आले, परंतु डॉक्टरांनी दुपारी ३.३० वाजता त्याला मृत घोषित केले.

श्रवणच्या आत्महत्येनंतर त्याच्याच शेजारी राहणाऱ्या १९ वर्षीय दिक्षा दयानंद खळसोडे हिनेही आत्महत्येचा प्रयत्न केला. मिळालेल्या माहितीनुसार, श्रवण आणि दिक्षा यांच्यात प्रेमसंबंध होते. श्रवणच्या आत्महत्येनंतर त्याच्या कुटुंबीयांनी दिक्षाला त्याला त्रास दिल्याबद्दल दोषी ठरवले. या आरोपांना घाबरून दिक्षानेही तिच्या घरी गळफास घेण्याचा प्रयत्न केला.

परिस्थितीचे गांभीर्य लक्षात घेत बीट मार्शल एकचे पोलीस हवालदार ठोकळ आणि बीट स्पेशल ससाने यांनी तातडीने दिक्षाच्या घरी धाव घेतली आणि योग्य वेळी दरवाजा उघडला. यामुळे तिचा आत्महत्येचा प्रयत्न असफल ठरला. तिला तातडीने राजावाडी रुग्णालयात दाखल करण्यात आले असून, तिच्यावर उपचार सुरू आहेत. दरम्यान, श्रवणने आत्महत्या का केली, याचे नेमके कारण अद्याप स्पष्ट झालेले नाही. पोलीस या प्रकरणाचा पुढील तपास करत आहेत. या घटनेमुळे परिसरात हळहळ व्यक्त होत आहे.