Atishi : पहिल्यांदा आमदार, मंत्री झाल्यानंतर वर्षभरातच होणार मुख्यमंत्री; कोण आहेत आतिशी?

दिल्ली : अरविंद केजरीवाल यांच्या राजीनाम्यानंतर आपकडून आतिशी मार्लेना यांच्याकडे मुख्यमंत्रिपदाची जबाबदारी सोपवण्यात येणार आहे. आप आमदारांच्या बैठकीत आतिशी मार्लेना यांच्या नावावर शिक्कामोर्तब करण्यात आलं आहे. आतिशी मार्लेना या दिल्लीच्या तिसऱ्या महिला मुख्यमंत्री असतील. अरविंद केजरीवाल यांच्या मंत्रिमंडळातील त्या सर्वात वजनदार अशा मंत्री होत्या. त्यांच नाव मुख्यमंत्रीपदाच्या शर्यतीत सर्वात पुढे होतं. आमदारांच्या बैठकीत आतिशी यांच्या नावावर शिक्कामोर्तब झालं. मंगळवारी सकाळी आपचे संयोजक केजरीवाल यांनी आमदारांची बैठक बोलावली होती. यात सर्वानुमते गटनेतेपदी आतिशी यांची निवड करण्यात आली. आतिशी पंजाबी राजपूत परिवारातील असून त्यांनी ऑक्सफर्ड युनिवर्सिटीतून पदवीचं शिक्षण घेतलंय.