Trending:

तीन विद्यार्थ्यांना वर्गातून बाहेर काढले, कारण वाचून बसेल धक्का; कॉलेजमध्ये हाय-व्होल्टेज ड्रामा

Published by:Jaykrishna Nair

Last Updated:December 03, 2025 7:03 PM IST

Controversy On Ayyappa Mala: चीकमंगळूरमधील PU कॉलेजात अयप्पा माळ घालून आलेल्या विद्यार्थ्यांना वर्गाबाहेर काढल्याने नवा धार्मिक वाद पेटला आहे. हिंदू संघटनांच्या तीव्र निषेधानंतर कॉलेजला माघार घ्यावी लागली आणि विद्यार्थ्यांना पुन्हा वर्गात प्रवेश देण्यात आला.

इम्पॅक्ट शॉटतुमचा गेटवे लेटेस्ट न्यूज

बेंगळुरू: बिदरमध्ये परीक्षा देण्यासाठी आलेल्या अभियांत्रिकी विद्यार्थ्यांच्या जानव्याचा (पूनूल) धागा काढून टाकल्याच्या वादाचे पडसाद अजूनही शांत होत नाहीत, तोच चीकमंगळूरमधील एका खाजगी कॉलेजात नवा वाद उफाळला आहे. शबरीमलेला जाण्यासाठी व्रत घेत अयप्पा माळ घालून कॉलेजात आलेल्या तीन विद्यार्थ्यांना वर्गातून बाहेर काढण्यात आले. या घटनेनंतर हिंदू संघटनांच्या नेत्यांनी तीव्र निषेध नोंदवल्यानंतर संबंधित विद्यार्थ्यांना पुन्हा वर्गात प्रवेश देण्यात आला.

ही घटना चीकमंगळूरमधील एमईएस पीयू कॉलेजमध्ये घडली. प्रथम वर्षात शिकणारे तीन पीयू विद्यार्थी अयप्पा माळ घालून आणि काळ्या रंगाचे कपडे परिधान करून कॉलेजात पोहोचले होते. मात्र प्राचार्यांनी यास विरोध दर्शवत त्यांना वर्गात बसण्याची परवानगी दिली नाही. विद्यार्थ्यांना माळ काढून ठेवण्यास आणि कॉलेजचा ठरलेला ड्रेस कोड/युनिफॉर्म काटेकोरपणे पाळण्यास सांगितले गेले. ही बाब समजताच हिंदू संघटनांचे नेते कॉलेजमध्ये दाखल झाले आणि प्राचार्यांच्या या निर्णयाला जाब विचारला.

प्राचार्यांनी कॉलेजमध्ये ठरवलेला युनिफॉर्मच फक्त मान्य असून इतर कोणताही वेषभूषेतील बदल किंवा अतिरिक्त धार्मिक चिन्हे स्वीकारली जाणार नाहीत, अशी भूमिका मांडली. यावर संघटनांच्या नेत्यांनी, “जर एखादा विद्यार्थी बुरखा घालून आला तर त्यालाही तुम्ही हाच नियम लावून वर्गाबाहेर काढाल का?” असा थेट प्रश्न उपस्थित केला. नेत्यांनी असा युक्तिवाद केला की विद्यार्थी कॉलेजचा युनिफॉर्म घालूनच आले होते; फक्त त्यावर काळा कपडा आणि अयप्पा माळ एवढेच अतिरिक्त होते. त्यामुळे हे नियम फक्त हिंदू विद्यार्थ्यांवरच लादले जात आहेत आणि हिंदू विद्यार्थ्यांनाच लक्ष्य केले जात असल्याचा आरोपही त्यांनी केला.

शेवटी झालेल्या निषेध, चर्चा आणि तणावपूर्ण वातावरणानंतर कॉलेज प्रशासनाने माघार घेतली आणि त्या तीनही विद्यार्थ्यांना पुन्हा वर्गात प्रवेश देण्याची परवानगी दिली. या घटनेमुळे कॉलेजच्या ड्रेस कोड, धार्मिक प्रतीकांचे स्वातंत्र्य आणि समान नियमांच्या अंमलबजावणीबाबत नव्याने चर्चा सुरू झाली आहे.

view comments

Location :

Mumbai,Maharashtra

First Published :

December 03, 2025 7:03 PM IST

तीन विद्यार्थ्यांना वर्गातून बाहेर काढले, कारण वाचून बसेल धक्का; कॉलेजमध्ये हाय-व्होल्टेज ड्रामा