राजकारणापलीकडची जिगरी दोस्ती! नाना पाटेकरांच्या लेकाने शेअर केले अजित पवारांचे अनसीन फोटो, पोस्ट वाचून रडू येईल

महाराष्ट्राच्या राजकारणातील धडाडीचे नेते म्हणून ओळखल्या जाणाऱ्या अजित दादा पवारांच्या निधनाने अवघा महाराष्ट्र सुन्न झाला आहे. बुधवारी झालेल्या भीषण विमान अपघाताने केवळ एक प्रशासकच नाही, तर अनेकांचा हक्काचा माणूस हिरावला.

सोशल मीडियावर त्यांच्याबद्दलच्या पोस्ट्सचा महापूर आला असतानाच, ज्येष्ठ अभिनेते नाना पाटेकर यांचे सुपुत्र मल्हार पाटेकर याने शेअर केलेले काही दुर्मिळ फोटो सध्या सर्वांचे लक्ष वेधून घेत आहेत. हे केवळ फोटो नसून दोन दिग्गजांच्या घट्ट मैत्रीचे आणि कौटुंबिक जिव्हाळ्याचे प्रतीक आहेत.

मल्हारने त्याच्या सोशल मीडिया अकाउंटवर नाना पाटेकर आणि अजित दादांचे काही अनसीन फोटो शेअर केले आहेत. हे फोटो पुण्याजवळील डोणजे येथील पाटेकरांच्या फार्महाऊसवरचे आहेत.

राजकारणातील धावपळ आणि पत्रकारांची रीघ बाजूला सारून, दादा अनेकदा नानांच्या या निसर्गरम्य ठिकाणी पाहुणचारासाठी येत असत. त्यांचे तिथल्या साध्या जेवणाचा आस्वाद घेताना आणि मोकळ्या वातावरणात गप्पा मारतानाचे हे क्षण आज पाहून काळजात चर्रर होतंय.

हे फोटो शेअर करताना मल्हारने एक अत्यंत हृदयस्पर्शी पोस्ट लिहिली आहे. तो म्हणतो, "माननीय अजित दादा पवार साहेबांचे जाणे हे आमच्यासाठी वैयक्तिक नुकसान आहे. ते आमच्यासाठी कुटुंबाचाच एक भाग होते आणि आयुष्यभर राहतील. त्यांच्यासोबतच्या त्या अविस्मरणीय आठवणी आज मनाला चटका लावून जात आहेत. ही कधीही भरून न येणारी पोकळी आहे."

नाना पाटेकर आणि अजित पवार ही दोन टोकं असली, तरी त्यांच्यात एक गोष्ट समान होती, ती म्हणजे कामाची शिस्त. नानांनी अनेकदा जाहीर कार्यक्रमांमध्ये अजित दादांच्या कामाच्या पद्धतीचं कौतुक केलं होतं.

"कोणत्याही प्रसिद्धीची हाव न धरता गपचूप काम उरकरणारा माणूस," अशा शब्दांत नानांनी दादांचा गौरव केला होता. तर दादांनाही नानांचा स्पष्टवक्तेपणा आणि त्यांचं समाजकार्य मनापासून आवडायचं. व्यावसायिक जगाच्या पलीकडे जाऊन या दोघांमध्ये एक निखळ मैत्रीचं नातं तयार झालं होतं.

२८ जानेवारी २०२६ रोजी झालेल्या भयानक अपघातात महाराष्ट्राने आपला हक्काचा माणूस हिरावला. काल त्यांच्या पार्थिवावर शासकीय इतमामात अंत्यसंस्कार करण्यात आले. लाडक्या दादांना अखेरचा निरोप देण्यासाठी जनसागर लोटला होता. राजकीय नेत्यांपासून ते सांस्कृतिक क्षेत्रातील दिग्गजांपर्यंत प्रत्येकाने दादांना मानाचा मुजरा केला.