'जबरदस्ती घेऊन गेले...', झुबीन गर्गच्या बायकोचे खळबळजनक खुलासे, गायकाच्या मृत्यूचं गूढ वाढलं

मुळचा आसामचा असलेला आणि भारतीय म्युझिक इंडस्ट्रीतील प्रसिद्ध गायक झुबीन गर्गचा काही दिवसांआधी अकाली मृत्यू झाला. त्याच्या अकाली निधनाने संगीत क्षेत्रावर शोककळा पसरली आहे. त्याचे कुटुंबीय दु:खात बुडाले आहेत.  CNN-News18 ला दिलेल्या एका विशेष मुलाखतीत त्यांची पत्नी गरिमा गर्ग यांनी झुबीनच्या मृत्यूवर भाष्य केलं आहे. त्यांनी अनेक धक्कादायक खुलासे करत आरोपही केले आहेत.

गर्ग यांचे मॅनेजर सिद्धार्थ शर्मा आणि इव्हेंटचे मुख्य आयोजक श्यामकानू महंत यांना बुधवारी दिल्लीत अटक करण्यात आली. त्यांच्यावर सदोष हत्या, गुन्हेगारी कट आणि निष्काळजीपणामुळे मृत्यू घडवून आणल्याचा आरोप लावण्यात आला आहे.

झुबीन गर्ग भारत-सिंगापूर राजनैतिक संबंधांच्या 60 व्या वर्धापन दिनानिमित्त आयोजित समारंभासाठी सिंगापूरला गेले होते. दरम्यान समुद्राच्या पाण्यात पोहत असताना झुबीन गर्ग यांचा अकाली मृत्यू झाला. त्यांचा मृतदेह पाण्यावर तरंगत होता.

सिंगापूर पोलिसांनी सादर केलेल्या पोस्टमार्टम रिपोर्टमध्ये असं म्हटलं आहे की, झुबीनचा मृत्यू सिंगापूर बेटाजवळील पाण्यात पोहताना झाला. सिंगापूर अधिकाऱ्यांनी झुबीनच्या मृत्यूमध्ये कोणताही गैरप्रकार झाल्याच्या वृत्तांना दुजोरा दिलेला नाही.

गरिमा गर्ग यांनी सांगितले की, "आधीच्या दौऱ्यामुळे ते धकलेले होते. असं असूनही त्यांना अनपेक्षितपणे पिकनिकला आणि पोहण्यासाठी नेलं होतं. त्यांचा मॅनेजर तिथे उपस्थित होता. त्याने त्यांची काळजी का नाही घेतली? आपण आपला कल्चरल आयकॉन गमावला आहे."

गरिमा या पुढे म्हणाल्या, "18 सप्टेंबरच्या रात्री आमचं शेवटचं बोलणं झालं होतं. बोलताना त्यांनी त्यांच्या या पिकनिकचा कोणताही उल्लेख केला नव्हता. त्यांना या प्लानबद्दल काहीच माहिती नव्हती."

"झुबीन सहसा दिवसा झोपायचे पण त्यांना जबरदस्तीने नेण्यात आले असावे. ते औषध देखील घेत होते. पण मला माहित नाही की त्यांना औषध तरी देण्यात आले होते की नाही."

गरिमा यांनी असंही सांगितलं की,  "त्यांनी मॅनेजर सिद्धार्थला काय झाले असे विचारले तेव्हा त्याने तिला सांगितले की झुबीनला पहिल्यांदाच पाण्याखाली स्ट्रोक आला होता." गरिमा म्हणाल्या, "त्याला कधीही हृदयविकाराचा त्रास झाला नाही. जेव्हा त्याला स्ट्रोक आला तेव्हा तो एका मिनिटात बरा झाला. मला खरोखरच आश्चर्य वाटले. मी फोटो आणि व्हिडीओ पाठवण्याची मागणी केली तेव्हा त्यांनी नकार दिला."

गरिमा यांनी आरोप करत म्हटलं, "बऱ्याच गोष्टी घडत असतील. हा स्कूबा डायव्हिंगचा मृत्यू नव्हता. चौकशी सुरू आहे आणि आपण सर्वांना खरोखर काय घडले हे जाणून घ्यायचे आहे. मला न्यायव्यवस्थेवर विश्वास आहे. आसामचे मुख्यमंत्री हे गांभीर्याने घेत आहेत. मला खात्री आहे की आपल्याला लवकरच न्याय मिळेल."