Dharmendra Property : हेमा मालिनी यांना धर्मेंद्रंच्या संपत्तीमधून काय हवं? अभिनेता हयात असतानाच केलं होतं क्लिअर

अभिनेत धर्मेंद्र यांचं काही दिवसांआधीच निधन झालं. अनेक दिवस ते आजारी होते. त्यांच्या जुहू येथील राहत्या घरी त्यांनी अखेरचा श्वास घेतला. त्यांच्या निधनाची माहिती ही कुटुंबीयांकडून गुप्त ठेवण्यात आली होती.

धर्मेंद्र यांच्या निधनानंतर त्यांच्या 400 कोटींच्या संपत्तीचा मुद्दा सर्वाधिक चर्चेत आला. धर्मेंद्र यांनी त्यांच्या इतक्या वर्षांच्या कारकि‍र्दीत मोठी संपत्ती गाठिशी बांधली. फक्त घर नाही तर अनेक ठिकाणी बंगले, रेस्टॉरन्ट, फार्महाऊसमध्ये त्यांनी मोठी गुंतवणूक केली.

धर्मेंद्र यांनी दोन लग्न केली. त्यांची पहिली पत्नी प्रकाश कौर यांना चार मुलं झाली. त्यानंतर त्यांनी अभिनेत्री हेमा मालिनीबरोबर लग्न केलं. हेमा मालिनी यांना दोन मुली. म्हणजेच धर्मेंद्र यांचा दोन पत्नी आणि सहा मुलांचा मोठा परिवार आहे.

धर्मेंद्र यांच्या मृत्यूनंतर त्यांची कोट्यवधींची संपत्ती त्यांची पत्नी प्रकाश कौर आणि त्यांच्या मुलांना मिळणार. या संपत्ती हेमा मालिनी यांना कोणताही हिस्सा मिळणार नाही. पण हेमा मालिनी यांच्या दोन्ही मुलींना मात्र वडिलांच्या संपत्तीत हिस्सा मिळेल अशा अनेक चर्चा सध्या सुरू आहे.

तर दुसरीकडे धर्मेंद्र यांचं हेमा मालिनी यांच्याशी दुसरं लग्न हे अवैध मानलं जात आहे. पण हेमा मालिनी यांना धर्मेंद्र यांच्या संपत्तीतून नेमकं काय हवं आहे हे त्यांनी अभिनेता हयात असतानाच क्लिअर केलं होतं.

हेमा मालिनी यांनी 2022 साली इंडिया टुडेला दिलेल्या मुलाखतीत धर्मेंद्र यांच्या संपत्तीविषयी वक्तव्य केलं होतं. त्या म्हणाल्या होत्या, "मला माहिती होतं की थोडा त्रास नक्कीच होणार. पण मला फक्त प्रेम हवं होतं. त्यांनी नेहमी माझ्यासोबत असावं याशिवाय मला काय हवंय. मला त्यांच्याकडून ना कोणती संपत्ती, ना पैसा ना आणखी काही हवं. मला फक्त थोडसं प्रेम हवंय."

अभिनेत्री हेमा मालिनी आणि धर्मेंद्र यांनी 1980 साली लग्न केलं. दोघांचं लग्न खूप चर्चेत आलं होतं. हेमा मालिनी यांना प्रचंड टीकेचाही सामना करावा लागला होता.