'त्याला कोणी ओळखणारही नाही', शाहरुखबद्दल हे काय बोलून गेला विवेक ओबेरॉय? राज कपूरबद्दल म्हणाला...

मुंबई: बॉलिवूडचा 'किंग खान' शाहरुख खान याची लोकप्रियता केवळ देशातच नाही, तर जगभरात आहे. त्याच्या नावावर 'सुपरस्टार' चा शिक्कामोर्तब झालेला असताना, अभिनेता विवेक ओबेरॉय याने शाहरुखच्या स्टारडमच्या भविष्यावर एक मोठे आणि धक्कादायक विधान केले आहे. या वक्तव्यामुळे सोशल मीडियावर शाहरुखच्या चाहत्यांमध्ये आणि बॉलिवूडमध्ये मोठी चर्चा सुरू झाली आहे.

विवेक ओबेरॉय सध्या त्याच्या 'मस्ती ४' चित्रपटाच्या प्रमोशनमध्ये व्यस्त आहे. एका मुलाखतीदरम्यान विवेकने बदलत्या युवा पिढीबद्दल आणि स्टारडमच्या अस्थिरतेबद्दल आपले मत व्यक्त केले.

'पिंकविला'ला दिलेल्या मुलाखतीत विवेक ओबेरॉय म्हणाला, "आजकालच्या पिढीला १९६० च्या दशकातील चित्रपट किंवा त्यावेळच्या कलाकारांबद्दल फारशी माहिती नाही. तसेच, त्यांना फारसा फरकही पडत नाही."

विवेकने पुढे म्हटले की, "प्रत्येकाला शेवटी इतिहासातच जमा व्हायचे आहे. २०५० मध्ये कदाचित लोक हेही विचारतील की, 'कोण शाहरुख खान?' तेव्हा कदाचित सगळे शाहरुख खानलाही विसरून गेले असतील."

विवेक ओबेरॉयने बदलत्या पिढीची आवड आणि पुराणमतवादी स्टारडम कशा प्रकारे बदलत आहे, यावर आपले मत मांडले. "रणबीर कपूरचे जे चाहते आहेत, त्यांना कदाचित हे माहीतही नसेल की त्यांचे आजोबा राज कपूर कोण होते. आपण त्यांना सिनेमाचा देव मानतो, पण रणबीर कपूरचे तरुण चाहते त्यांना ओळखतही नसतील," असे विधान विवेकने केले.

विवेकच्या मते, पिढी बदलल्यावर लोकांची आवड आणि निवड बदलते आणि त्यामुळे स्टारडमचे महत्त्वही बदलते. विवेक ओबेरॉयच्या या वक्तव्यामुळे सोशल मीडियावर तीव्र वादविवाद सुरू झाला आहे. एका बाजूला विवेकचे समर्थक त्याच्या वास्तववादी बोलण्याला पाठिंबा देत आहेत, तर दुसऱ्या बाजूला शाहरुख खानचे चाहते त्याच्यावर जोरदार टीका करत आहेत.

शाहरुख खानने नुकताच आपला ६० वा वाढदिवस साजरा केला आहे. दुसरीकडे, विवेक ओबेरॉय लवकरच 'मस्ती ४' आणि इतर चित्रपटांमध्ये दिसणार आहे.