Health Tips : पालकापेक्षा जास्त पॉवरफुल आहे ही 'चायनीज भाजी', हाडं आणि हृदय बनवते मजबूत

पालकापेक्षा चायनीज कोबी जास्त फायदेशीर मानली जाते. कारण, त्यात पालकापेक्षा जास्त व्हिटॅमिन सी आणि ए असते. हाडे मजबूत करण्यासाठी आणि हृदयाला आजारांपासून दूर ठेवण्यासाठी ही भाजी महत्त्वाची भूमिका बजावते. लखनऊच्या रीजेंसी हॉस्पिटलच्या आहारतज्ञ रितू त्रिवेदी यांनी या भाजीचे सर्व फायदे तपशीलवार सांगितले आहेत.

नावाप्रमाणे, ही भाजी सर्वप्रथम चीनमध्ये तयार करण्यात आली होती, त्यानंतर ती भारतासह जगभरात पिकवली जाऊ लागली. चायनीज कोबीला नापा कोबी, सेलेरी कोबी, बोक चोय आणि पोक चोई अशी अनेक नावं आहेत. चायनीज कोबीमध्ये साध्या कोबीपेक्षा जास्त व्हिटॅमिन ए असते. चायनीज कोबी कच्ची खाल्ल्यास चवदार, कुरकुरीत आणि गोड लागते. शिजवल्यावर ती मऊ होते. ही भाजी वाफवून, ग्रील करून आणि उकळूनही खाता येते.

हाडांसाठी फायदेशीर : अन्न आणि पोषण तज्ञ ही कोबी शरीरासाठी खूप फायदेशीर मानतात. आहारतज्ञ रितू त्रिवेदी सांगतात की, चायनीज कोबीमध्ये व्हिटॅमिन के, कॅल्शियम, मॅग्नेशियम, लोह, जस्त आणि फॉस्फरस पुरेशा प्रमाणात असतात. हे घटक हाडे मजबूत करण्यास मदत करतात.

हृदयाचे नुकसान टाळते : चायनीज कोबीमध्ये हृदयाच्या आजारांपासून संरक्षण करण्याचे गुणधर्म आहेत. त्यामुळे या चायनीज कोबीचे सेवन केल्याने रक्तवाहिन्यांना नुकसान करणारे घटक कमकुवत होतात, रक्ताभिसरण सुरळीत राहते. यामुळे हृदय निरोगी राहते. कोबीच्या भाज्यांमध्ये अँटिऑक्सिडंट गुणधर्म आढळतात.

शरीरातील सूज कमी होते : शरीरातील सूज कमी करण्यासाठी चायनीज कोबी महत्त्वाची भूमिका बजावू शकते. वास्तविक, या चायनीज कोबीमध्ये शक्तिशाली कोलीन देखील आढळते. हे घटक शरीरातील जळजळीशी लढतात आणि शरीराला सामान्य आजारांपासून वाचवण्यास मदत करतात.

बीपी नियंत्रित करते : चायनीज कोबीमध्येही बीपी नियंत्रित करण्याची क्षमता असते. या चायनीज कोबीमध्ये असलेले पोटॅशियम रक्तदाब नियंत्रित करण्यास मदत करते. त्यामुळे त्याचा आहारात समावेश करणे आरोग्यासाठी फायदेशीर ठरू शकते.

(इथं दिलेली माहिती तज्ज्ञांशी केलेल्या चर्चेवर आधारित आहे. ही एक सामान्य माहिती आहे. कोणताही व्यक्तीगत सल्ला नाही. आपण कोणत्याही पदार्थाचं सेवन करण्याआधी याबद्दल डॉक्टर किंवा तज्ज्ञांचा सल्ला घ्यावा. संबंधित माहितीसाठी न्यूज18 मराठी जबाबदार नसेल.)