Konkan Weather: वादळी वारे अन् विजांचा कडकडाट, कोल्हापूरला पुन्हा झोडपणार, कोकणात काय स्थिती?

राज्यातील हवामानात गेल्या काही काळात मोठे बदल जाणवत आहेत. एप्रिल महिन्यातच उष्णतेचा तडाखा वाढला आहे. विदर्भात पारा 45 पार गेला आहे. तर पश्चिम महाराष्ट्र आणि कोकणात देखील तापमानात मोठी वाढ झालीये. अशातच कोल्हापूर आणि कोकण परिसरावर अवकाळी संकट घोंघावत आहे.

भारतीय हवामान खात्याच्या (IMD) ताज्या अंदाजानुसार, आज 23 एप्रिल 2025 रोजी कोल्हापूर आणि जवळच्या कोकण पट्ट्यातील हवामान ढगाळ, उष्ण आणि दमट राहण्याची शक्यता आहे. कोल्हापूर आणि कोकणातील रत्नागिरी, सिंधुदुर्ग, रायगड यांसारख्या किनारी भागांसाठी यलो अलर्ट जारी करण्यात आला आहे.

कोल्हापुरात आज किमान तापमान 24°C आणि कमाल तापमान 38°C पर्यंत राहील, तर सरासरी तापमान 29°C च्या आसपास असेल. 22 एप्रिलला कोल्हापुरात वादळी वाऱ्यासह (ताशी 30-40 किमी) आणि विजांच्या कडकडाटासह जोरदार पावसाने हजेरी लावली. आज पावसाची तीव्रता कमी होऊन तुरळक ठिकाणी हलका पाऊस किंवा मेघगर्जना अपेक्षित आहे.

उष्ण आणि दमट वातावरणामुळे नागरिकांनी दुपारी 12 ते 3 दरम्यान थेट सूर्यप्रकाश टाळावा, पुरेसे पाणी प्यावे आणि हलके, सैल कपडे परिधान करावेत. हवेची गुणवत्ता सामान्यतः समाधानकारक राहील, परंतु धुळीचे कण आणि उष्णतेमुळे हवेचा AQI काहीसा प्रभावित होऊ शकतो.

कोकणातील किनारी भागांत आज किमान तापमान 25°C आणि कमाल तापमान 34-36°C राहील. आर्द्रता 60-70% पर्यंत जाणवेल, ज्यामुळे दमटपणा अधिक तीव्र असेल. वारे ताशी 20-30 किमी वेगाने वाहतील, काही ठिकाणी वादळी वाऱ्याची (ताशी 40 किमीपर्यंत) शक्यता आहे.

22 एप्रिलला रत्नागिरी, सिंधुदुर्ग आणि रायगडमध्ये विजांसह पाऊस झाला असून, आज तुरळक ठिकाणी हलका पाऊस किंवा मेघगर्जना अपेक्षित आहे. समुद्रकिनारी खवळलेल्या लाटा आणि वादळी वारे यामुळे मच्छिमारांना समुद्रात न जाण्याचा इशारा देण्यात आला आहे.

कोल्हापूर आणि कोकणात उष्णतेमुळे हायड्रेटेड राहावे. दुपारी घराबाहेर पडणे टाळावे आणि सनस्क्रीन, टोपी यांचा वापर करावा. तुरळक पावसाची शक्यता असल्याने छत्री किंवा रेनकोट सोबत ठेवावा. रस्त्यांवरील पाणी साचण्याची शक्यता लक्षात घेऊन वाहनचालकांनी सावधगिरी बाळगावी.शेतकऱ्यांनी पिकांचे पावसापासून संरक्षण करावे.