विदर्भात थंडीचा कडाका! 2 जिल्ह्यांत पारा घसरला, हवामान विभागाचा महत्त्वाचा अलर्ट

राज्यात गेले दोन दिवस तुरळक ठिकाणी पावसाची शक्यता वर्तवण्यात आली आहे. दक्षिण कोकण आणि दक्षिण मध्य महाराष्ट्रातील काही जिल्ह्यात आज 15 नोव्हेंबरला हलक्या ते मध्यम पावसाची शक्यता आहे. विदर्भात मात्र पुढील काही दिवस कुठलीही पावसाची शक्यता नाही. विदर्भात ढगाळ वातावरण आणि आता थंडीचा जोर बघायला मिळत आहे.

गेल्या काही दिवसांत विदर्भातील किमान तापमानात घट झाल्याने थंडीचा कडाका आणखी वाढणार आहे. विदर्भातील जवळपास सर्व जिल्ह्यांमध्ये धुक्यासह ढगाळ आकाश असणार आहे. अमरावती, अकोला, वाशिम, या सर्व जिल्ह्यातील किमान तापमान हे 18 अंश सेल्सिअस इतके आहे. या तिन्ही जिल्ह्यांमध्ये गुरुवारी असलेलं तापमान कायम आहे, त्यात कोणताही बदल नाही.

वर्धा, गोंदिया, चंद्रपूर, गडचिरोली, बुलढाणा, नागपूर या सर्व जिल्ह्यातील किमान तापमान हे 16 अंश सेल्सिअस इतके आहे. त्यामुळे या भागांत थंडीचा कडाका वाढण्यास सुरुवात झाली आहे. यवतमाळ आणि भंडारा या जिल्ह्यातील किमान तापमान 15 अंश सेल्सिअस इतके असणार आहे. या दोन जिल्ह्यातील किमान तापमानात सर्वाधिक घट नोंदवल्या गेली आहे.

दिवसेंदिवस विदर्भातील किमान तापमानात घट होताना दिसून येत आहे. पुढील काही दिवसांत तापमानात आणखी घट होण्याची शक्यता असल्याने नागरिकांनी आरोग्याची काळजी घेणे आवश्यक आहे. विदर्भातील जवळपास सर्वच जिल्ह्यांमध्ये धुक्यासह ढगाळ वातावरण असणार आहे.

हिवाळ्यामध्ये धुके आणि ढगाळ वातावरण पिकांच्या नुकसानीस कारणीभूत ठरतं. काही भागांत तूर पिकांत अळीचा प्रादुर्भाव झाल्याचे दिसून येत आहे. काही भागांत तुरीला उदळी लागली आहे. म्हणजेच शेतकऱ्यांच्या नुकसानीत आणखी भर पडण्याची शक्यता आहे. शेतकऱ्यांनी योग्य ती काळजी घेणे गरजेचे आहे.