विमानप्रवासाचं स्वप्न खरं होणार, फक्त 150 रुपयांमध्ये बुक करा विमानाचं तिकीट, जाणून घ्या कसं....

विमानाचं तिकीट भरपूर असल्याने बरेच लोक याऐवजी बस किंवा रेल्वेचाच पर्याय निवडतात. पण हवाई प्रवास सर्वांसाठी सुलभ व्हावा या उद्देशाने केंद्र सरकार उडान (UDAN) ही योजना राबवत आहे. ही योजना प्रादेशिक हवाई सेवांना चालना देण्यासाठी आणि सामान्य लोकांना विमानाने प्रवास करण्यास सक्षम करण्यासाठी तयार करण्यात आली आहे.

ही उडान योजना केंद्र सरकारने 21 ऑक्टोबर 2016 रोजी लागू केली. त्यामुळे देशातील अनेक शहरांच्या विमान तिकिटांच्या किमतीत कमालीची घट झाली आहे. प्रादेशिक कनेक्टिव्हिटी स्कीम-RCS मध्ये सहभागी झालेल्या विमान कंपन्यांनी 50 मिनिटांपेक्षा कमी प्रवासाचा कालावधी असलेल्या मार्गांवरील तिकीट दर मोठ्या प्रमाणात कमी केले आहेत.

सरकार UDAN अंतर्गत विमान कंपन्यांना अनुदान देत आहे. याच अंतर्गत अलायन्स एअरलाइन्स 150 रुपयांमध्ये फ्लाइट तिकीट देत आहे. Alliance Airlines आसाममधील लीलाबारी आणि तेजपूर शहरांदरम्यान फक्त 150 रुपयांमध्ये पोहोचवत ​​आहे.

या मार्गावर कंपनीच्या दररोज 2 फ्लाईट आहेत आणि गेल्या 2 महिन्यांपासून याची सर्व तिकिटं पूर्णपणे बुक आहेत. जर तुम्ही तेजपूर ते लीलाबारी बसने प्रवास केलात तर हे अंतर सुमारे 216 किमी आहे आणि या प्रवासासाठी सुमारे 4 तास लागतात.

तर, या मार्गावरील फ्लाइटचं अंतर केवळ 147 किमी आहे आणि ते पूर्ण करण्यासाठी फक्त 25 मिनिटं लागतात. या प्रवासासाठी एकेरी प्रवासाचं भाडं 150 रुपये आहे. सरकारने कमी किमतीत विमान प्रवासाची सुविधा सुरू केल्यापासून फ्लाईट 95 टक्के प्रवाशांनी भरलेलीच असते.

या मार्गावरील तिकीटाचे दर परवडणारे असावे यासाठी सरकारने उडान योजना सुरू केल्याची माहिती भारतीय विमानतळ प्राधिकरणाच्या अधिकाऱ्यांनी दिली आहे. उडान योजनेंतर्गत लोकांना स्वस्त दरात विमान प्रवास करण्याची संधी मिळते. यासोबतच सरकारकडून विमान कंपन्यांना व्हायबिलिटी गॅप फंडिंग (व्हीजीएफ) देण्यात येत आहे.