India won Champions Trophy: रोहित, वरुण नाही तर कोणामुळे भारताने जिंकली चॅम्पियन्स ट्रॉफी; विराटने सांगितले Secret

2025 ICC चॅम्पियन्स ट्रॉफी जिंकल्यानंतर भारतीय संघाचा दिग्गज फलंदाज विराट कोहलीने आपल्या भावना व्यक्त केल्या. ऑस्ट्रेलियाच्या आव्हानात्मक दौऱ्यानंतर संघाने जोरदार पुनरागमन करण्याचा निर्धार केला होता आणि अखेर चॅम्पियन्स ट्रॉफी जिंकण्याचे स्वप्न पूर्ण झाले. कोहलीने संघातील युवा खेळाडूंचे विशेष कौतुक केले आणि अनुभवी खेळाडू कसे त्यांना मार्गदर्शन करत आहेत, हे सांगितले.

संघासाठी अभिमानाचा क्षण: विजयानंतर कोहली म्हणाला, ही एक अविस्मरणीय भावना आहे. आम्हाला ऑस्ट्रेलियाच्या कठीण दौऱ्यानंतर पुनरागमन करायचे होते आणि एक मोठी स्पर्धा जिंकायची होती. त्यामुळे चॅम्पियन्स ट्रॉफी जिंकणे अद्भुत आहे. आमच्या संघात खूप टॅलेंट आहे, प्रत्येकजण आपला खेळ उंचावत आहे आणि आम्ही वरिष्ठ खेळाडू म्हणून त्यांना मदत करण्याचा प्रयत्न करतो. आपल्या अनुभवातून काहीतरी देण्याचा आनंद आहे आणि यामुळेच भारतीय संघ इतका मजबूत आहे.

संघातील प्रत्येक खेळाडूने दिला मोलाचा वाटा: कोहलीने सांगितले की, स्पर्धेदरम्यान प्रत्येक खेळाडूने कधी ना कधी संघासाठी महत्त्वाची भूमिका बजावली आहे. संघातील प्रत्येक खेळाडूने कधी ना कधी आपली जबाबदारी उचलली आहे आणि महत्त्वाच्या क्षणी चमकदार कामगिरी केली आहे. सराव सत्रांमध्ये आम्ही घेतलेल्या मेहनतीचे हे फळ आहे. अशा स्पर्धांमध्ये खेळणे हेच क्रिकेटचे खरे सौंदर्य आहे. अशा दबावाच्या परिस्थितीत स्वतःला सिद्ध करण्याची संधी मिळते.

भविष्याची तयारी: विराट कोहलीने भारतीय संघाच्या भविष्यासंदर्भातही आत्मविश्वास व्यक्त केला. जेव्हा आपण संघ सोडतो, तेव्हा तो अधिक चांगल्या स्थितीत सोडायचा असतो. मला खात्री आहे की हा संघ पुढील आठ वर्षे जागतिक क्रिकेटवर वर्चस्व गाजवेल. शुभमन गिलने अप्रतिम फलंदाजी केली, श्रेयस अय्यरने काही मोठ्या खेळी केल्या, केएल राहुलने सामना संपवण्याची जबाबदारी घेतली, आणि हार्दिक पांड्याने फलंदाजीत मोलाचा हातभार लावला. या संघात पुढील पिढीतील सुपरस्टार्स आहेत.

न्यूझीलंड संघाचे कौतुक, केन विल्यमसनसाठी सहानुभूती: विराट कोहलीने पराभूत न्यूझीलंड संघाचे विशेष कौतुक केले आणि त्यांना 'सर्वोत्कृष्ट क्षेत्ररक्षण संघ' म्हणून गौरवले. न्यूझीलंड संघ नेहमीच प्रभावी राहिला आहे. मर्यादित खेळाडू उपलब्ध असूनही, त्यांची अंमलबजावणी नेहमीच उत्कृष्ट असते. त्यांनी सामना शेवटपर्यंत चुरशीचा ठेवला. त्यांचा आक्रमक आणि गोलंदाजांना साथ देणारा दृष्टिकोन त्यांना स्पर्धात्मक बनवतो. त्यांचे क्षेत्ररक्षण अव्वल दर्जाचे आहे.

विशेषतः केन विल्यमसनबद्दल बोलताना कोहली म्हणाला, माझ्या चांगल्या मित्राला पराभव स्विकारावा लागला याची खंत वाटते. परंतु न्यूझीलंड संघ नेहमीच संघटित आणि कणखर राहतो. ते नेहमी क्रिकेटच्या बेसिक गोष्टींचे पालन करतात आणि यामुळेच स्पर्धांमध्ये ते चांगली कामगिरी करतात.

चॅम्पियन्स ट्रॉफी 2025 मध्ये भारताने एकाही सामन्यात टॉस जिंकला नाही. एकदाही टॉस न जिंकता विजेतेपद मिळवणारा भारत हा पहिला संघ ठरला आहे. भारताचे हे चॅम्पियन्स ट्रॉफीचे तिसरे विजेतेपद आहे तर आयसीसी स्पर्धेचे हे टीम इंडियाचे सातवे विजेतेपद ठरले आहे.