पंतप्रधान मोदींची सभा, छत्रपती संभाजीनगरमध्ये वाहतुकीत बदल, हा रस्ता बंद!

पंतप्रधान मोदी यांची छत्रपती संभाजीनगर आणि जालन्यातील 14 मतदारसंघांसाठी चिकलठाणा एमआयडीतील ग्रॅहम फर्थ कंपनीच्या मैदानावर सभा होत आहे. त्यासाठी मोठी गर्दी होणार असल्याने वाहतुकीत बदल करण्यात आले आहेत. जालना रोडवरील केंब्रिज चौक ते वसंतराव नाईक चौक यादरम्यानचा रस्ता दुपारी 12 ते 4 या वेळेत बंद ठेवण्यात येणार आहे. सभेसाठी 60 हजार चौरस फुटांचा मंडप उभारण्यात येत आहे. सभेच्या परिसरातील मधमाशांचे मोहोळ हटवण्याच्या सूचना केंद्रीय सुरक्षा यंत्रणांनी दिल्या आहेत.

दरम्यान, विधानसभा निवडणुकीच्या पार्श्वभूमीवर छत्रपती संभाजीनगर आणि जालना जिल्ह्यातील 14 मतदारसंघांसाठी चिकलठाणा परिसरात सभेचं आयोजन केलं आहे. यापूर्वी 2019 च्या विधानसभा निवडणुकीनिमित्त मोदी आले होते. 2014 मध्ये पंतप्रधान झाल्यापासून मोदी तिसऱ्यांदा शहरात येत आहेत. त्यामुळे सभेला गर्दी होण्याची शक्यता असून 15 एकर क्षेत्रात 75 हजार कार्यकर्त्यांसाठी बैठकीची व्यवस्था करण्यात आली आहे. तसेच सभेसाठी अडीच हजार पोलिसांचा बंदोबस्त तैनात केला आहे.