Trending:

Pune Mhada : पुण्यात स्वस्त घर घेण्याची संधी! म्हाडाची अर्ज प्रक्रिया लवकरच सुरु; जाणून घ्या तारीख अन् पात्रता

Published by:Tanvi
local18

Last Updated:September 11, 2025 2:16 PM IST

Pune Mhada : पुणेकरांसाठी स्वस्त घर घेण्याची सुवर्णसंधी आली आहे. म्हाडाच्या नवीन गृहनिर्माण योजनेअंतर्गत घरांसाठी अर्ज प्रक्रिया लवकरच सुरू होणार आहे.

पुणे : पुणेकरांसाठी ही अतिशय आनंदाची बातमी आहे. पुणे गृहनिर्माण आणि क्षेत्रविकास मंडळाने तब्बल 4186 घरांच्या भव्य सोडतीची घोषणा केली आहे. पुण्यात स्वतःचे घर असावे, हे अनेकांचे स्वप्न असते आणि म्हाडाच्या या योजनेमुळे हजारो कुटुंबांना आपले स्वप्न साकार करण्याची सुवर्णसंधी मिळणार आहे.

या सोडतीत विविध गृहनिर्माण योजनांचा समावेश करण्यात आला आहे. पंतप्रधान आवास योजना अंतर्गत 219 घरे उपलब्ध असून, विशेषतः आर्थिकदृष्ट्या दुर्बल घटकांसाठी ही योजना उपयुक्त ठरणार आहे. त्याचबरोबर म्हाडा गृहनिर्माण योजनेत 1683 घरे देण्यात येणार आहेत. सामाजिक न्यायाचा विचार करून 15% सामाजिक गृहनिर्माण योजनेअंतर्गत 864 घरे देण्यात आली आहेत. तसेच 20% सर्वसमावेशक गृहयोजनेअंतर्गत तब्बल 3322 घरांचा समावेश आहे. या सर्व योजनांमुळे समाजातील विविध स्तरांतील लोकांना परवडणाऱ्या किमतीत घरे घेण्याची संधी मिळणार आहे.

अर्ज प्रक्रिया वेळापत्रक:

ऑनलाईन अर्ज भरण्याची सुरुवात 11 सप्टेंबर 2025 रोजी दुपारी 12:30 वाजता होणार आहे. त्याच दिवशी अर्जदारांकडून ऑनलाईन अनामत रक्कम स्वीकृतीची सुरुवातही होईल. इच्छुकांना शेवटचा अर्ज सादर करण्याची संधी 31 ऑक्टोबर 2025 रोजी रात्री 11:55 वाजेपर्यंत मिळणार आहे. अनामत रक्कम ऑनलाईन भरण्याची अंतिम मुदत 31 ऑक्टोबर 2025 रात्री 11:59 वाजेपर्यंत ठेवण्यात आली आहे. मात्र, जे अर्जदार RTGS/NEFT द्वारे बँकेमार्फत पैसे भरणार असतील, त्यांनी 1 नोव्हेंबर 2025 रोजी संबंधित बँकेच्या कार्यालयीन वेळेत पैसे जमा करणे आवश्यक आहे.

सोडत प्रक्रिया:

सोडतीसाठी स्वीकृत अर्जांची प्राथमिक यादी 11 नोव्हेंबर 2025 रोजी सायंकाळी 6:00 वाजता जाहीर होईल. या यादीवर दावे आणि हरकती नोंदविण्याची अंतिम मुदत 13 नोव्हेंबर 2025 दुपारी 12:00 वाजेपर्यंत आहे. सर्व दावे-हरकतींचे परीक्षण करून अंतिम यादी 17 नोव्हेंबर 2025 रोजी सायंकाळी 6:00 वाजता प्रसिद्ध होईल. त्यानंतर 21 नोव्हेंबर 2025 रोजी दुपारी 12:00 वाजता घरांच्या सोडतीचे आयोजन केले जाईल. यशस्वी अर्जदारांची नावे त्याच दिवशी सायंकाळी 6:00 वाजता अधिकृत संकेतस्थळावर उपलब्ध करून दिली जातील.

अर्जाची पद्धत:

संपूर्ण प्रक्रिया ऑनलाईन पद्धतीने होणार असल्याने अर्जदारांनी वेळापत्रकाचे काटेकोर पालन करणे आवश्यक आहे. अर्ज करण्यासाठी प्रथम housing.mhada.gov.in या संकेतस्थळावर भेट द्यावी. प्रथम येणाऱ्यास प्रथम प्राधान्य तत्वावरील सदनिकांसाठी lottery.mhada.gov.in किंवा bookmyhome.mhada.gov.in या संकेतस्थळावर नोंदणी करावी.

संपर्क क्रमांक:

म्हाडा पुणे: 020-26128856 / 020-26128868

हेल्पलाईन (Probity): 022-69468100

अनामत रक्कम संदर्भात: 7006047212 / 7262003084

ईमेल: support.mhadapunelottery

ही संधी हजारो कुटुंबांसाठी आयुष्यभर लक्षात राहणारी ठरणार असून, स्वतःचे घर मिळविण्यासाठी अर्जदारांनी तत्परतेने अर्ज प्रक्रिया पूर्ण करणे आवश्यक आहे.

Location :

Mumbai,Maharashtra

First Published :

September 11, 2025 2:15 PM IST

Pune Mhada : पुण्यात स्वस्त घर घेण्याची संधी! म्हाडाची अर्ज प्रक्रिया लवकरच सुरु; जाणून घ्या तारीख अन् पात्रता