Vitamin D : व्हिटॅमिन डी च्या सप्लिमेंट घेताय, पण योग्य वेळ कोणती माहिती आहे?

व्हिटॅमिन-डी हे आपल्या शरीरासाठी एक अत्यंत महत्त्वाचे पोषक तत्व आहे. हे केवळ हाडांच्या आरोग्यासाठीच नाही, तर रोगप्रतिकारशक्ती आणि मानसिक आरोग्यासाठीही आवश्यक आहे. सूर्याच्या प्रकाशातून नैसर्गिकरित्या व्हिटॅमिन-डी मिळत असले तरी, अनेकदा त्याच्या कमतरतेमुळे सप्लीमेंट घ्यावी लागते. पण, ही सप्लीमेंट कधी आणि कशी घ्यावी हे जाणून घेणे महत्त्वाचे आहे.

जेवणानंतर घ्या: व्हिटॅमिन-डी हे एक फॅट-सोल्युबल व्हिटॅमिन आहे. याचा अर्थ, हे शरीरात चरबीमध्ये विरघळून शोषले जाते. त्यामुळे, व्हिटॅमिन-डी सप्लीमेंट नेहमी जेवणानंतर, विशेषतः ज्या जेवणात निरोगी चरबी असेल, तेव्हा घ्यावे. यामुळे शरीरात ते चांगल्या प्रकारे शोषले जाते.

दुपारचे जेवण सर्वोत्तम वेळ: व्हिटॅमिन-डी सप्लीमेंट घेण्यासाठी दुपारच्या जेवणानंतरची वेळ सर्वात उत्तम मानली जाते. कारण, या वेळी शरीराचे चयापचय जास्त सक्रिय असते. तुम्ही हे सकाळच्या नाश्त्यानंतरही घेऊ शकता.

दररोज एकाच वेळी घ्या: व्हिटॅमिन-डीचा पुरेपूर फायदा घेण्यासाठी ते दररोज एकाच वेळी घेणे महत्त्वाचे आहे. त्यामुळे शरीराला त्याची सवय लागते आणि ते व्यवस्थित काम करते.

व्हिटॅमिन-के2सोबत घ्या: व्हिटॅमिन-डी सप्लीमेंट व्हिटॅमिन-के2 सोबत घेतल्यास त्याचे फायदे वाढतात. व्हिटॅमिन-डी शरीरात कॅल्शियमचे शोषण वाढवते, तर व्हिटॅमिन-के2 ते कॅल्शियम हाडांपर्यंत पोहोचवण्यास मदत करते.

डॉक्टरांचा सल्ला: सप्लीमेंट घेण्यापूर्वी डॉक्टरांचा सल्ला घेणे आवश्यक आहे. डॉक्टर तुमच्या रक्ताची तपासणी करून व्हिटॅमिन-डीची कमतरता किती आहे हे पाहून तुम्हाला योग्य डोस सांगतील. जास्त प्रमाणात सप्लीमेंट घेतल्यास शरीराला धोका होऊ शकतो.

नैसर्गिक स्रोत: फक्त सप्लीमेंटवर अवलंबून न राहता, व्हिटॅमिन-डी नैसर्गिकरित्या मिळवण्यासाठी सूर्यप्रकाशात बसा. सकाळी 10 ते दुपारी 3 या वेळेत 15-20 मिनिटे उन्हात बसणे फायदेशीर आहे. यासोबतच दूध, अंडी आणि मशरूम यांसारख्या पदार्थांचा आहारात समावेश करा. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)