Video: पुण्यात मराठी वि.अमराठी वाद पेटला, रेल्वे स्टेशन परिसरात रिक्षाचालक आणि विद्यार्थ्यांमध्ये बाचाबाची

अभिजीत पोते, प्रतिनिधी

पुणे :  पुणे रेल्वे स्थानक परिसरात गुरुवारी संध्याकाळी मराठी-अमराठी वादाचा आणखी एक प्रकार समोर आला आहे. रिक्षाचालक आणि काही विद्यार्थ्यांमध्ये मराठी भाषेवरून बाचाबाची झाल्याने परिसरात काही काळ तणावाचे वातावरण निर्माण झाले. घटनेचा व्हिडिओ सोशल मीडियावर व्हायरल झाल्यानंतर नागरिकांमध्ये संतापाची लाट पसरली असून, संबंधित विद्यार्थ्यांवर कठोर कारवाईची मागणी केली जात आहे.

मिळालेल्या माहितीनुसार, काही विद्यार्थी रेल्वे स्थानकाजवळील चहाच्या टपरीवर थांबले असताना त्यांचा रिक्षाचालकाशी किरकोळ वाद झाला. त्या वेळी रिक्षाचालकाशी मराठीत संवाद साधण्याचा प्रयत्न केला असता  त्याने भाषेविरोधात अपमानास्पद वक्तव्ये केली, शिवीगाळ केली आणि अश्लील हातवारे केले, अशी माहिती प्रत्यक्षदर्शींनी दिली आहे.  मी मराठी बोलणार नाही, काय करायचं ते करा असं  वक्तव्य केल्याने वाद अधिक पेटला.

घटनेनंतर आजूबाजूचे नागरिक  निषेध करत पोलिसांना बोलावलं. पोलिसांनी घटनास्थळी धाव घेत वाद शांत करण्याचा प्रयत्न केला. मात्र, मराठी भाषेचा अपमान केल्याच्या संतापातून काही वेळ वातावरण तणावपूर्ण बनलं होतं.

दरम्यान, सोशल मीडियावर या घटनेचे व्हिडीओ मोठ्या प्रमाणावर सोशल मीडियावर व्हायरल होत असून, मराठी भाषेचा अपमान करणाऱ्यांवर कठोर कारवाई करण्याची मागणी होत आहे. विविध मराठी संघटना आणि स्थानिक नागरिकांनी देखील या घटनेचा निषेध नोंदवत महाराष्ट्रात राहून मराठीचा अपमान सहन केला जाणार नाही, अशी भूमिका घेतली आहे.

पोलिसांनी या प्रकरणी  ओळख पटवून तपास सुरू केला असल्याचं सांगितलं आहे. या प्रकारामुळे मराठी-अमराठी वादाचा मुद्दा पुन्हा एकदा ऐरणीवर आला आहे. नागरिकांनी संयम बाळगावा आणि कोणत्याही अफवांवर विश्वास ठेवू नये, असं आवाहन पोलिसांकडून करण्यात आलं आहे.