Pune News : निवडणुकीआधी पुण्यात खळबळ, दोन सहाय्यक आयुक्तांची उचलबांगडी, कारण काय?

शेवाळवाडी आणि मांजरी परिसरातील पाहणी दरम्यान अस्वच्छता, रस्त्यांवरील खड्डे, सांडपाण्याचा प्रवाह आणि अतिक्रमण या समस्यांचा मोठ्या प्रमाणावर सामना झाला. या निष्क्रियतेमुळे हडपसर क्षेत्रीय कार्यालयाचे सहाय्यक आयुक्त बाळासाहेब ढवळे-पाटील यांची तडकाफडकी बदली केली गेली आहे. तसेच मलनिःसारण विभागाचे शाखा अभियंता, घनकचरा व्यवस्थापन विभागाचे आरोग्य निरीक्षक आणि मुकादम व्यवस्थित काम करत नसल्याने त्यांना निलंबित केले आहे.

दोन दिवसांपूर्वी वाघोली भागात झालेल्या पाहणी दरम्यान रस्त्यावर सांडपाणी वाहताना दिसले. मोठ्या प्रमाणावर अतिक्रमण आढळल्याने सहायक आयुक्त शीतल वाकडे, उपअभियंता विनायक शिंदे आणि गणेश पूरम यांचीही बदली करण्यात आली. आयुक्त राम यांनी स्पष्ट केले की, शेवाळवाडी, मांजरी आणि वाघोली भागातील कामचुकार आणि निष्काळजी अधिकाऱ्यांमुळे नागरिकांना त्रास सहन करावा लागत आहे.

पुणे-सोलापूर महामार्गावरील दुभाजक आणि रस्तेही घाण आणि कचऱ्याने भरलेले होते. आयुक्तांनी संबंधित विभागांना तत्काळ स्वच्छता करण्याचे आदेश दिले आहेत. शहरातील अस्वच्छता, सांडपाणी, वाहतूक कोंडी आणि अतिक्रमणाच्या समस्यांवर अधिकारी प्रभावीपणे काम करत नसतील तर त्यांना कठोर कारवाईला सामोरे जावे लागेल.

महापालिकेच्या कामकाजातील निष्काळजीपणा आता सहन केला जाणार नाही, नागरिकांच्या मूलभूत सुविधांशी खेळणाऱ्या अधिकाऱ्यांना महापालिकेत स्थान मिळणार नाही. खात्यांतर्गत चौकशीनंतर अधिकाऱ्यांची अकार्यकारी पदावर बदली आणि निलंबनाची कारवाई केली जाईल असे आयुक्तांनी सांगितले.