Sports: आजवर फक्त 65 भारतीयांना जमली 'ही' गोष्ट, पंढरपूरच्या 16 वर्षांच्या पठ्ठ्याने करून दाखवलं!

गेल्या वर्षी, सहिष्णूने सहा व्यक्तींच्या टीमसोबत 16 तासांच्या संघर्षानंतर इंग्रजी खाडी पार केली होती. यावर्षी त्याने तीन जणांच्या टीमसोबत मागच्या वर्षीपेक्षा कमी वेळेत म्हणजे १५ तास ८ मिनिटांत हे अंतर पार केले. सहिष्णू हा दोन वेळा इंग्रजी खाडी पार करणारा सर्वात तरुण भारतीय असून आजवरच्या इतिहासात केवळ 65 भारतीयांनी इंग्लिश खाडी पोहली आहे. त्याच्या या उल्लेखनीय कामगिरीने भारतीयांची मान उंचावली आहे आणि त्याचबरोबर असंख्य तरुण खेळाडूंना प्रेरणा देखील दिली आहे.

या आपल्या यशावर बोलताना सहिष्णू म्हणतो की,  "मी अशा असंख्य भारतीय व्यक्तींविषयी वाचन केल्यानंतर पटलेली आणि कळलेली गोष्ट म्हणजे त्यांनी अशक्य वाटणाऱ्या अडथळ्यांवर मात करूनच विजय मिळवलेला आहे. पोहताना येणाऱ्या अडथळ्यांवर त्यांचा आदर्श समोर ठेवत मी मात केली. मी माझ्या प्रशिक्षणाने माझ्यात विकसित झालेली शिस्त, आणि भारतीय योग्यांप्रमाणे आपल्या ध्येयाकडे पूर्ण लक्ष केंद्रित करून केलेलं समर्पण ह्या गोष्टींना समोर ठेऊन पोहत राहिलो , मला पुढे नेत राहिलो . भारताचे प्रतिनिधित्व करण्याचा अभिमान आणि जगाला आपण भारतीय काय करू शकतो हे दाखवण्याची मिळालेली संधी, याने मला माझे सर्वस्व देण्यास प्रवृत्त केले." असं म्हणत आपल्याला मिळालेलं यश कुटुंब आणि सर्व पाठिराख्यांचं आहे, असं सहिष्णू जाधव म्हणाला.