हृदयद्रावक, जीव वाचवणाऱ्या अ‍ॅम्ब्युलन्सने 3 वर्षाच्या मुलाचा जीव घेतला; काळीज चर्र करणारा Video

ही घटना मुलताई पोलिस ठाण्याच्या हद्दीत घडली. अपघातावेळी मुलाचा वडील आपल्या शिक्षक पत्नीला शाळेत सोडण्यासाठी निघाले होते. मात्र, वाटेत त्यांच्या दुचाकीचे पेट्रोल संपल्याने त्यांनी ती रस्त्याच्या कडेला उभी केली आणि बाटलीत पेट्रोल घेण्यासाठी रस्त्याच्या पलीकडे असलेल्या पेट्रोल पंपावर गेले. त्यावेळी मुलाची आई आणि 3 वर्षीय चिमुकला दुचाकीच्या जवळ उभे होते. अचानक मुलगा धावत हायवेवर आला आणि भरधाव अ‍ॅम्ब्युलन्सने त्याला धडक दिली.

धडकेनंतर मुलगा सुमारे 25 फूट दूर जाऊन कोसळला. गंभीर जखमी अवस्थेत त्याला रुग्णालयात दाखल करण्यात आले, मात्र डॉक्टरांनी त्याला मृत घोषित केले. या घटनेनंतर मुलताई पोलीस अ‍ॅम्ब्युलन्स आणि तिच्या चालकाचा शोध घेत आहेत. सीसीटीव्ही फुटेजमध्ये हा अपघात इतक्या वेगाने घडल्याचे दिसते की, चालकाकडेही सावध होण्याचा वेळ नव्हता. मात्र, वेग कमी असता तर कदाचित या निष्पाप जीवाला वाचवता आले असते.