शेतकऱ्यांसाठी महत्वाची अपडेट! कांदा विक्रीसंदर्भात नाफेडने केला खुलासा

नॅशनल ॲग्रीकल्चरल को-ऑपरेटिव्ह मार्केटिंग फेडरेशन ऑफ इंडिया लिमिटेड (नाफेड)ने या संदर्भात अधिकृत भूमिका मांडत चुकीच्या बातम्यांना पूर्णविराम दिला आहे. नाफेडने सांगितले की, ग्राहक व्यवहार विभाग (DoCA), भारत सरकार यांच्या सूचनेनुसार यावर्षी महाराष्ट्रात फक्त 12 मेट्रिक टन (MT) कांद्याचीच विक्री करण्यात आली आहे. यापलीकडे कोणतीही विक्री झालेली नाही.

नाफेडने शेतकऱ्यांच्या हिताचे रक्षण करणे हेच आपले सर्वोच्च ध्येय असल्याचे पुन्हा अधोरेखित केले आहे. बाजारपेठेतील स्थैर्य टिकवून ठेवणे, शेतकऱ्यांना योग्य भाव मिळावा यासाठी प्रयत्नशील राहणे आणि शासनाच्या निर्देशानुसारच कारवाई करणे हे संस्थेचे धोरण असल्याचे नाफेडने नमूद केले.

नाफेडने यासंदर्भात इशारा देत म्हटले आहे की, चुकीच्या बातम्या किंवा अफवा पसरवून शेतकऱ्यांना दिशाभूल करणाऱ्या व्यक्ती वा संस्थांविरुद्ध कठोर कारवाई करण्यात येईल. अशा प्रकारे अफवा पसरविण्याचा थेट परिणाम शेतकरी आणि ग्राहक दोघांवर होतो. त्यामुळे समाजमाध्यमांद्वारे किंवा इतर माध्यमांतून कोणतीही अप्रमाणित माहिती पसरवली गेल्यास ती थांबवण्यासाठी कायदेशीर पावले उचलली जातील. असा इशारा नाफेडने दिला आहे.