राज्यातील 'या' अतिवृष्टीग्रस्त तालुक्यांना मिळणार विशेष सवलती, सुधारित यादी जाहीर

जून ते सप्टेंबर २०२५ या कालावधीत झालेल्या अतिवृष्टी, पूर आणि पिकांच्या हानीचा सखोल आढावा घेतल्यानंतर शासनाने हा निर्णय घेतला आहे. या निर्णयानुसार प्रभावित भागातील नागरिकांना दुष्काळसदृश परिस्थितीत मिळणाऱ्या सवलती आणि सुविधा देण्यात येणार आहेत.

सहकारी कर्जांचे पुनर्गठन.

शेतीशी संबंधित कर्ज वसुलीवर एक वर्षाची स्थगिती.

तिमाही वीज बिलात माफी.

दहावी व बारावीतील विद्यार्थ्यांच्या परीक्षा शुल्क आणि फीमध्ये सूट.

अहिल्यानगर जिल्ह्यात एकूण १४ तालुके बाधित ठरले असून, त्यात पारनेर, संगमनेर, अकोले अंशतः तर शेवगाव, राहाता, श्रीरामपूर, राहुरी, श्रीगोंदा आणि नेवासा हे पूर्णतः बाधित आहेत. पुण्यात हवेली आणि इंदापूर हे तालुके प्रभावित आहेत. सोलापूर जिल्ह्यात ११ तालुके बाधित असून त्यात उत्तर व दक्षिण सोलापूर, बार्शी, अक्कलकोट, पंढरपूर आणि माढा आदींचा समावेश आहे. सांगली जिल्ह्यात १० तालुके तर साताऱ्यात ८ तालुके पूरग्रस्त घोषित झाले आहेत. कोल्हापूर जिल्ह्यात करवीर, राधानगरी, गगनबावडा, आजरा आणि चंदगडसह एकूण ८ तालुके बाधित आहेत.

संपूर्ण राज्यभर या पूरस्थितीत नाशिक, नांदेड, यवतमाळ, गडचिरोली, अमरावती, चंद्रपूर आणि जळगाव हे जिल्हे सर्वाधिक नुकसानग्रस्त ठरले आहेत. शासनाच्या अहवालानुसार, एकूण २८२ तालुक्यांपैकी २५१ तालुके पूर्णतः आणि ३१ तालुके अंशतः बाधित असल्याचे निष्पन्न झाले आहे. यामुळे सरकारने या सर्व भागांना आपत्तीग्रस्त घोषित करून दुष्काळसदृश सवलती आणि मदतीचा लाभ देण्यास मंजुरी दिली आहे.