दुचाकीस्वारांना ठराविक वेळेतच उड्डाणपुलावरून बंदी
हिंजवडी वाहतूक विभागाचे पोलीस निरीक्षक राहुल सोनवणे यांनी सांगितलं की, गुरुवारी सकाळपासून लाऊडस्पीकरच्या माध्यमातून या बदलाची घोषणा करण्यात आली. उड्डाणपुलावर दुभाजक नसल्यामुळे, तो चारचाकी वाहनांसाठीच मर्यादित ठेवण्याचा निर्णय घेण्यात आला आहे. दुचाकी वाहनांवरील बंदी ही कायमस्वरूपी नसून केवळ गर्दीच्या वेळेत लागू राहणार आहे. सकाळी 8 ते 11 आणि संध्याकाळी 5 ते रात्री 9 या वेळेत दुचाकीस्वारांना उड्डाणपुलाचा वापर करता येणार नाही. मात्र, या वेळे व्यतिरिक्त दुचाकी वाहनांना नेहमीप्रमाणेच उड्डाणपुलावरून जाण्याची मुभा असेल.
advertisement
Pimpri News : पिंपरीचे रस्ते खड्डेबंबाळ, जनता बेहाल; महापालिकेचा मात्र 'टक्क्यात' दावा
दुचाकींसाठी पर्यायी मार्ग
वाकडहून हिंजवडीकडे जाणाऱ्या दुचाकीस्वारांनी उड्डाणपुलाचा वापर न करता सुर्या अंडरपासवर डावीकडे वळावे. तेथून लगेच यू-टर्न घेऊन पुढे जाता येईल. या वळणामुळे फक्त 50 ते 100 मीटर अतिरिक्त अंतर जोडलं जाईल.
हिंजवडीहून वाकडकडे जाणाऱ्या दुचाकी वाहनांसाठी सयाजी अंडरपासवर डावीकडे वळून यू-टर्न घेण्याची व्यवस्था करण्यात आली आहे.
वाहतूक विभागाने नागरिकांना आवाहन केलं आहे की, या नवीन व्यवस्थेमुळे उद्भवणाऱ्या कोणत्याही अडचणी अथवा तक्रारी भुजबळ चौकातील हिंजवडी वाहतूक विभाग कार्यालयात किंवा चिंचवड गावातील एल्प्रो मॉलजवळील मुख्य वाहतूक शाखेत नोंदवाव्यात. ही माहिती वाहतूक विभागाच्या अहवालानुसार आहे. याबाबत अधिकृत परिपत्रक अद्याप जारी झालेलं नाही.