गरजू लोकांना वस्तू मोफत उपलब्ध
महापालिका आयुक्त शेखर सिंह व अतिरिक्त आयुक्त विजयकुमार खोराटे यांच्या मार्गदर्शनाखाली आणि उपायुक्त सचिन पवार यांच्या देखरेखीखाली महापालिकेच्या आरआरआर केंद्रांमध्ये संकलित साहित्याचे प्रथम वर्गीकरण केले जाते. या प्रक्रियेत उपयुक्त वस्तू गरजू नागरिकांना मोफत दिल्या जातात, तर उर्वरित साहित्य रिसायकल प्रक्रियेद्वारे नव्याने वापरासाठी तयार केले जाते. या पद्धतीमुळे शहरातील कचऱ्याचे प्रमाण कमी होते आणि समाजातील गरजू लोकांना आवश्यक वस्तू मिळतात.
advertisement
आरआरआर सेंटरवर कोणत्या वस्तू जमा करू शकता?
महापालिकेच्या आरआरआर केंद्रांमध्ये नागरिक घरातील न वापरल्या जाणाऱ्या पण उपयुक्त वस्तू जमा करू शकतात. यामध्ये जुनी पण वापरण्यायोग्य पुस्तके, वह्या, शालेय साहित्य, चांगल्या स्थितीतील कपडे, चादरी, मुलांची खेळणी, शैक्षणिक साधने, घरगुती भांडी, फर्निचर, घरगुती वस्तू, छोटे-मोठे इलेक्ट्रॉनिक उपकरणे, चपला व इतर उपयुक्त साहित्याचा समावेश आहे. जमा केलेल्या वस्तूंचे वर्गीकरण करून उपयुक्त वस्तू गरजू नागरिकांना मोफत उपलब्ध करून दिल्या जातात, तर उर्वरित साहित्य रिसायकल प्रक्रियेद्वारे नव्याने वापरासाठी तयार केल्या जातात.
आरआरआर सेंटरच्या माध्यमातून गरजूंना उपयुक्त वस्तू मोफत उपलब्ध करून दिल्या जात आहेत. या उपक्रमामुळे पुनर्वापराची संस्कृती शहरात रुजत आहे आणि हे सेंटर शहराला शाश्वत व पर्यावरणपूरक बनविण्यास मदत करू शकतात, असे पिंपरी-चिंचवड महापालिकेचे उपायुक्त सचिन पवार यांनी सांगितले.