Video: सोशल मीडियातून कसे मिळवायचे पैसे? भाडिपा फेम सारंग साठ्येच्या खास टिप्स

सोशल मीडियावर तुमचा प्लॅटफॉर्म किंवा तुमच्या चैनलवरचा कंटेंट तुमच्या हातात आहे. त्यामुळे सगळा विचार करून आणि योग्य पद्धतीने तुम्ही या क्षेत्रात आलात तर या क्षेत्रात करिअर करणे शक्य आहे. फक्त करिअर करताना या क्षेत्रात दुरगामी विचार करणे गरजेचे आहे. सोशल मीडिया हे ट्रेंडच्या आधारावर चालते. जसा आजूबाजूचा ट्रेंड असेल तसेच आपण वागणे गरजेचे आहे. सध्या कशाचा ट्रेंड आहे, काय चलन आहे, यावर आपण जर लक्ष ठेवले. तर नक्कीच सोशल मीडिया मधून चांगला पैसाही कमवता येतो आणि एक महत्त्वाचा उत्पन्नाचा स्त्रोतही यातून निर्माण करता येतो, असे सारंग साठ्ये यांनी सांगीतले आहे.

खरं पाहायला गेलं तर सोशल मीडिया द्वारे कसे आणि किती पैसे कमवू शकतो, हे सर्वस्वी आपल्यावर अवलंबून आहे. या माध्यमातून अगदी कोट्यावधी रुपये देखील कमवता येतात आणि उपजीविकेसाठी गरजेचे असलेले थोडे थोडकेच पैसेही कमवता येतात. मात्र आपण कोणत्या मार्गाने जायचे हे पूर्णपणे आपण ठरवावे लागते. मात्र आज मोठमोठे कंटेंट क्रियेटर्स कोट्यावधी रुपये कमवत असताना प्रत्येकाला ती गोष्ट शक्य असेल असे नाही आणि प्रत्येकाला सगळे मिळेलच असेही नाही, असेही सारंग यांनी स्पष्ट केले.

सोशल मीडियासाठी कंटेंट बनवताना आपण काय प्रकारचा आणि कशा पद्धतीचा कंटेंट बनवतोय हे जाणून घेणे गरजेचे असते. आपण किती चांगलं आपल्या प्रेक्षकांपर्यंत पोहोचतो. याचा प्रयत्न नेहमी करत राहायला हवा. कारण त्या प्रमाणात आणि तितकी प्रसिद्धी मिळेलच असे नाही, असे सांगत सारंग यांनी दिग्गज अभिनेते मनोज वाजपेयी आणि शाहरुख खान यांचेही उदाहरण दिले. हे दोघेही साधारण एकाच वयाचे असून दोघांचाही प्रेक्षक वर्ग वेगळा आहे आणि दोघांची प्रसिद्धीही तितकीच वेगवेगळ्या प्रमाणात आहे. त्यामुळे या श्रेणीमध्ये आपण कुठे आहोत हे ओळखले पाहिजे. हे सगळया गोष्टी डोक्यात ठेवूनच तुम्ही या क्षेत्रात उतरा असा सल्लाही सारंग साठ्ये यांनी दिला आहे.