थरार! आधी पत्नीचा गळा चिरला, मग फेसबुक लाईव्हवर येऊन म्हणाला, 'मीच तिला मारलं'... पण का?

ही घटना कोल्लम जिल्ह्यातील पुनालुरजवळ घडली. येथील रहिवासी इसहाक आणि त्याची पत्नी शालिनी यांच्यात गेल्या अनेक काळापासून वाद सुरू होते. सोमवारी सकाळी साडेसहाच्या सुमारास शालिनी नेहमीप्रमाणे घराजवळील पाइपलाइनजवळ अंघोळीसाठी गेली. तेव्हाच दबा धरून बसलेल्या इसहाकने धारदार चाकूने तिच्यावर हल्ला केला. शालिनीवर त्याने गळ्यावर, छातीवर आणि पाठीवर सपासप वार केले. ती वेदनेने किंचाळत होती, पण तिला वाचवण्याची संधी कोणालाच मिळाली नाही. काही क्षणांतच त्याने तिचा गळा चिरला आणि शालिनी रक्ताच्या थारोळ्यात खाली कोसळली.

पत्नी रक्ताच्या थारोळ्यात निपचित पडलेली असताना, इसहाकने थंड डोक्याने मोबाईल काढला आणि फेसबुक लाईव्ह सुरू केले. त्याने कॅमेऱ्यासमोर आपणच पत्नीला संपवल्याचे सांगितले आणि तिच्यावर दागिने हडपल्याचा व बेवफाईचा आरोप केला. यानंतर तो थेट पुनालुर पोलीस ठाण्यात हजर झाला आणि म्हणाला, "मी माझ्या पत्नीची हत्या केली आहे." त्याचे हे शब्द ऐकून पोलीसही चक्रावून गेले. त्यांनी तात्काळ घटनास्थळी धाव घेतली असता, त्यांना शालिनीचा मृतदेह रक्ताने माखलेल्या अवस्थेत आढळला. पोलिसांनी इसहाकला अटक केली असून पुढील तपास सुरू आहे.