Matrimonial Site : मॅट्रिमोनियल साईटवरुन अनेक मुलींना गंडा, महिला डॉक्टरकडून 20 लाख उकळले, कशी होती पद्धत?

आपण फॅशन डिझायनर आणि काँग्रेसच्या मोठ्या नेत्याचा पुतण्या असल्याची बतावणी करुन हा गुन्हेगार मॅट्रिमोनियल साईटवरील मुलींशी मैत्री करायचा. त्यांना आपल्या जाळ्यात अडकवून लग्नाची मागणी घालायचा आणि त्यांच्याकडून पैसे उकळायचा. अशा पद्धतीने त्याने कित्येक तरुण मुलींचं आयुष्य उद्ध्वस्त केलंय, मात्र नुकतीच एका तरुणीने त्याला अद्दल घडवली आहे. ही तरुणी डॅाक्टर आहे. पैसे उकळून फसवणूक केल्याप्रकरणी तिने पोलिसांकडे तक्रार केली. त्यानंतर पोलिसांनी त्याला अटक केली.

हे प्रकरण कॅरिअरगंज पोलिस स्थानकाच्या हद्दीतील आहे. मूळची चंडीगड येथील रहिवासी असलेल्या, सध्या गोरखपूरमध्ये राहाणाऱ्या डॅाक्टर तरुणीने आरोपीविरोधात पोलिसांकडे धाव घेतली. तिने गेल्या वर्षी जीवनसाथी डॅाट कॅामवर आपलं प्रोफाईल तयार केलं होतं. ऑक्टोबर 2023 मध्ये पहिल्यांदा कानपूर येथील अनुभव तिवारी नावाच्या तरुणाने तिच्याशी संपर्क साधला. आपण फॅशन डिझायनर आणि बिझनेसमन आहोत, काका काँग्रेसचे मोठे नेते आहेत अशी माहिती त्याने दिली. दोघांची चांगली मैत्री झाली. फोनवरही नियमित बोलू लागली. कान्हा टेक्सटाईल कंपनी आपल्या मालकीची असल्याचं त्याने तरुणीला सांगितलं.

डॅाक्टर तरुणी म्हणाली, ‘गेल्या सात डिसेंबरला तो गोरखपूरला आला. आधार कार्ड दाखवलं. त्यावर त्याच्या जन्मतारखेमध्ये 2000 साल नोंदवलं होतं. त्याने मला बोलण्यात गुंतवलं आणि आपल्या व्यक्तिमत्त्वाची छाप पाडली. मी त्याला प्रामाणिक समजले आणि बोलत राहिले. मात्र नंतर अधून मधून काही ना काही अडचण आली असं सांगून तो माझ्याकडे पैसे मागू लागला. माझा अपघात झालाय आणि उपचारांसाठी पैसे हवे आहेत असं त्याने अनेकदा सांगितलं. व्हॅाट्सॲपववर प्रिस्क्रिप्शनही पाठवलं. आपल्या डोक्यावर बंदूक रोखलेल्या अवस्थेत किंवा डिप्रेशनचा आजार आहे असं सांगून रेल्वेच्या रुळावर झोपूनही त्याने मला व्हिडिओ कॉल केले. आत्महत्या करण्याची इच्छा त्याने अनेकवेळा बोलून दाखवली. तो नाटक करतो आहे असं मला वाटलं नाही. त्यामुळे मी त्याला समजावत राहिले. माझ्याकडून त्याने 19 लाख 38 हजार रुपये उकळले. मी पैसे परत मागितले तेव्हा त्याने बनावट डिमांड ड्राफ्ट मला पाठवला. त्यावेळी मला आपण फसवले गेलोय ही जाणीव झाली,’ असं या तरुणीने स्पष्ट केलं.