Govinda-Sunita Ahuja : 'आता डिव्होर्स होणार नाही!' गोविंदाने सुनीताला दिला लाखोंचा नेकलेस, नेटकऱ्यांनी घेतली फिरकी

अभिनेता गोविंदा यांनी सुनीता यांना एक मोठा आणि जड सोन्याचा हार भेट दिला आहे. सुनीता आहूजा यांनी इन्स्टाग्रामवर दोन फोटो शेअर केले आहेत, ज्यात त्या हा सुंदर हार दाखवताना दिसत आहेत. हा हार पाहूनच त्याची किंमत लाखोंच्या घरात असेल, असा अंदाज चाहते लावत आहेत. या फोटोंसोबत सुनीता यांनी कॅप्शनमध्ये लिहिले, "सोना कितना सोना है! गोविंदा... माझे करवा चौथचे गिफ्ट आले आहे." त्यांच्या या पोस्टवर चाहते आणि फॉलोअर्स भरभरून प्रतिक्रिया देत आहेत.

मागील काही महिन्यांपासून गोविंदा आणि सुनीता यांच्या घटस्फोटाच्या आणि मतभेदांच्या चर्चा जोरदार रंगल्या होत्या. अशात करवा चौथच्या निमित्ताने गोविंदा यांनी सुनीता यांना एवढी महागडी भेटवस्तू दिल्यानंतर, चाहत्यांच्या प्रतिक्रिया खूपच गमतीशीर आणि तिखट आल्या आहेत.

एका युजरने थेट लिहिले, "आता कोणताही घटस्फोट होणार नाही." तर दुसऱ्या एका युजरने 'चीटिंगनंतरचं गिफ्ट' अशी टिप्पणी केली. एका व्यक्तीने तर, "इतके सोने मिळूनही रोज यांचा घटस्फोट होत असतो," असे उपरोधिकपणे म्हटले आहे. तर एका युजरने, "रोज तर घटस्फोट घेत असतात," अशी आठवण करून दिली.

करवा चौथच्या या गिफ्टमुळे पुन्हा एकदा गोविंदा आणि सुनीता यांच्यातील मतभेदांच्या अफवांवर पडदा पडला आहे. यापूर्वी गणेश चतुर्थीच्या वेळीही दोघांनी एकत्र येऊन घटस्फोटाच्या चर्चांना पूर्णविराम दिला होता.

एएनआयला दिलेल्या मुलाखतीत सुनीता यांनी या चर्चांवर बोलताना स्पष्ट केले होते, "आम्हाला कोणीही वेगळं करू शकत नाही, वरून देव आला किंवा कोणताही शैतान आला तरीही कोणी आम्हाला वेगळं करू शकत नाही. माझा गोविंदा फक्त माझाच आहे आणि कोणाचा नाही. आम्ही तोंड उघडेपर्यंत, कृपया तुम्ही लोक कोणतीही गोष्ट बोलू नका."