Gautami Patil: मोठी बातमी, गौतमी पाटीलच्या कारने रिक्षाला दिली धडक, 3 जण जखमी, चालक पोलिसांच्या ताब्यात

मिळालेल्या माहितीनुसार,  पुण्यात गौतमी पाटील हिच्या कारला पहाटेच्या सुमारास अपघात झाला.  या कारचा पुण्यातील मुंबई-बंगळूरू राष्ट्रीय महामार्गावरील वडगाव पुलाजवळ अपघात झाला.  हा अपघात एका हॉटेल समोर झाला.

या हॉटेलसमोर रिक्षाचालक उभा होता. रिक्षामध्ये दोन प्रवासी होते. त्याचवेळी भरधाव वेगात आलेल्या गौतमी पाटील हिच्या गाडीने रिक्षाला जोराची पाठीमागून धडक दिली. ही धडक इतक्या जोरात होती की, रिक्षा काही अंतरापर्यंत ढकलला गेला.  या अपघातात रिक्षाचे मोठे नुकसान झाले आहे. या अपघातात रिक्षाचालकासह दोन प्रवासी जखमी झाले आहे. अपघात झाल्यानंतर तातडीने लोक धावून आले. त्यांनी जखमी रिक्षाचालक आणि प्रवाशांना तातडीने नजीकच्या रुग्णालयात दाखल केलं.

घटनेची माहिती मिळताच पोलिसांनी घटनास्थळी धाव घेतली. पोलिसांनी गौतमी पाटील हिच्या चालकाला ताब्यात घेतलं आहे. चालकाने गौतमी पाटील हिची कार असल्याचं पोलिसांना सांगितलं आहे.  सिंहगड रोड पोलिसांकडून या प्रकरणाचा अधिक तपास सुरू आहे.