Panipuri : नाशिकच्या तरुणीनं सुरू केली 'पापा की परी पाणीपुरी', महिन्याला करते बक्कळ कमाई

नाशिक : पाणीपुरी म्हणजे अनेकजणांसाठी अगदी जीव की प्राण, पाणीपुरी पाहिल्यावर फार कमी लोक असे असतील की, ज्यांना एकही पुरी खाऊ नये असं वाटत असावं. परंतु पाणीपुरी खाण्याची आवड मात्र एका तरुणीच्या अगदी जीवावर बेतता बेतता राहिली. पाणीपुरी खाल्ल्यानंतर तब्बल वर्षभर तिला घरीच आराम करावा लागला, मग पाणीपुरीच काय कोणतेही चमचमीत पदार्थ खाण्याची तिला मनाई करण्यात आली होती. मग काय, ही तरुणी आराम करून ठणठणीत बरी झाली आणि आपल्यासारखा त्रास इतरांना सोसावा लागू नये यासाठी तिनं स्वत: पाणीपुरीचा व्यवसाय करायचं ठरवलं.

पाणीपुरी हा पदार्थ कितीही चवदार असला तरी त्यातलं जर पाणी स्वच्छ नसेल, तर तो तब्येत बिघडवणारा ठरू शकतो. शिवाय अनेकजणांना पाणीपुरी पाहिल्यावर स्वत:ला आवरणं कठीण होतं. अशा सर्व खाद्यप्रेमींसाठी नाशिकच्या पृष्णा राहुल या तरुणीनं स्वत: सगळी स्वच्छता बाळगून बनवलेली पाणीपुरी विकायला सुरुवात केली. आज ही पाणीपुरीच तिची ओळख झाली आहे. या पाणीपुरीचं नाव आहे 'पापा की परी पाणीपुरी'. सोशल मीडियावरही तिची चर्चा झाली.