Winter Hair Care: हिवाळ्यात केसांत कोंडा वाढतोय, खाजही सुटते? डॉक्टरांनी सांगितला रामबाण उपाय

अमरावती: हिवाळ्यामध्ये त्वचा कोरडी झाल्याने अनेक समस्या निर्माण होतात. सर्वात मोठी समस्या म्हणजे केसातील कोंडा. केसातील कोंडा वाढला की डोक्याला खाज सुटणे, कपाळावर पुरळ येणे, चेहऱ्याला खाज येणे, अशा समस्या वाढतात. त्यातच खाजवताना हाताला कोंड्याचे बारीक कण लागतात आणि इन्फेक्शन होते. त्यामुळे केसातील कोंडा कमी करणे गरजेचे आहे. हिवाळ्यात केसातील कोंडा टाळण्यासाठी काय उपाय करावेत? याबाबत अमरावती येथील त्वचारोग आणि सौंदर्य तज्ज्ञ डॉ. अनुराधा टाकरखेडे यांनी लोकल18 सोबत बोलताना माहिती दिलीये.

डॉ. अनुराधा टाकरखेडे सांगतात की, हिवाळ्यात त्वचा कोरडी होते. त्यामुळे केसातील कोंडा जास्त वाढतो. त्याचबरोबर आपल्या काही बारीक सारीक चुकांमुळे त्याचे फंगल इन्फेक्शन होते. त्यामुळे योग्य ती काळजी घेण्याची गरज असते.

“काय करावं यापेक्षा काय करू नये, याकडे लक्ष दिले तर तुमच्या केसातील कोंडा कमी होण्यास नक्की मदत होईल. त्याचबरोबर डॉक्टरांच्या सल्ल्याने एखादा शाम्पू वापरणे सुद्धा तेवढेच गरजेचे आहे. त्यामुळे केसातील कोंडा कमी होऊन चेहऱ्यावरील पुरळ कमी होतात. कोंडा हा चेहऱ्यावरील पिंपल्ससाठी सुद्धा कारणीभूत असतो, असेही डॉ. टाकरखेडे यांनी सांगितले.