Time Management : कामांनुसार करा दिवसाची आखणी, पोमोडोरो तंत्रानं कामं होतील वेगात, दिवसभराच्या कामांसाठी उपयुक्त टिप्स

कामं करत दिवसभर व्यस्त राहणं किंवा एकाच वेळी अनेक कामं हाताळत असाल तर ही माहिती नक्की वाचा. Productivity म्हणजेच उत्पादकतेचा अर्थ आहे, कमी वेळेत दर्जेदार काम करणं. उत्पादकता वाढवायची असेल, तर दिनचर्येत काही लहान सवयींचा समावेश केल्यानं कामं सोपं होतील.

प्राधान्यक्रम तयार करा - बहुतेक जण सकाळी उठून कामांची यादी तयार करतात, ती पूर्ण झाली नाही तर त्याचा दिवसाच्या शेवटी ताण येतो. त्याऐवजी, तुमच्या यादीतून फक्त तीन सर्वात महत्त्वाची कामं निवडा.

रात्री झोपण्यापूर्वी, दुसऱ्या दिवसासाठीची सर्वात महत्त्वाची तीन कामं लिहून काढा. यामुळे सकाळी उठल्यावर, आपली ऊर्जा कुठे केंद्रित करायची आहे याची तुमच्या मनाला स्पष्ट कल्पना असेल. यामुळे निर्णय घेण्याचा थकवा कमी होतो.

पोमोडोरो तंत्राचा वापर - आपला मेंदू एकाच कामावर जास्त वेळ लक्ष केंद्रित करू शकत नाही. लक्ष केंद्रित करण्याची क्षमता सुधारण्याचा सर्वोत्तम मार्ग म्हणजे कामांची लहान लहान भागांमधे विभागणी करणं. पंचवीस मिनिटं पूर्ण एकाग्रतेनं काम करा आणि नंतर पाच मिनिटांची विश्रांती घ्या. याला पोमोडोरो तंत्र म्हणतात. चार पोमोडोरो केल्यानंतर, पंधरा - वीस मिनिटांची विश्रांती घ्या. या साध्या सवयीनं मन ताजंतवानं होईल आणि थकवा टाळणं शक्य होईल.

दोन मिनिटांचा नियम - कामात दिरंगाई टाळण्यासाठी ही पद्धत एक रामबाण उपाय आहे. एखादं काम दोन मिनिटांपेक्षा कमी वेळात होत असेल, जसं की ईमेलला उत्तर देणं, बिल भरणं किंवा डेस्क स्वच्छ करणं, तर ते नंतर करु म्हणून पुढे ढकलू नका. ते लगेच पूर्ण करा. छोटी कामं त्वरित केल्यानं मानसिक ताण कमी होतो आणि कामांची यादी आपोआप लहान होते.

डिजिटल डिटॉक्स आणि डीप वर्क - स्मार्टफोनवरील नोटिफिकेशन्स हे आपल्या एकाग्रतेचे सर्वात मोठे शत्रू आहेत. लक्ष एकदा विचलित झाल्यावर मेंदूला पुन्हा कामावर परत यायला वेळ लागतो. एकाग्रतेनं काम करण्यासाठी दिवसातून किमान एक-दोन तास बाजूला ठेवा. या वेळेत, फोन दुसऱ्या खोलीत ठेवा किंवा 'डू नॉट डिस्टर्ब' मोडवर ठेवा. साध्या कामापेक्षा व्यत्ययाशिवाय केलेलं काम अधिक चांगलं असतं.

दिवसातील सर्वात कठीण आणि महत्त्वाची कामं सर्वात आधी करा - यामुळे काहीतरी साध्य केल्याची भावना येईल. आपण अनेकदा अवघड कामं पुढे ढकलतो, ज्यामुळे आपल्या मनात एक ओझं तयार होतं. जेव्हा तुम्ही सकाळी सर्वात अवघड काम पूर्ण करता, तेव्हा तुमचा आत्मविश्वास वाढतो आणि इतर लहान कामं खूप सोपी वाटू लागतात.