Dombivli: पहिल्या वर्गात शिकणाऱ्या चिमुरडीसोबत 47 वर्षीय मुख्याध्यापकाचं चिड आणणारं कृत्य, डोंबिवलीतील घटना

पोलिसांनी दिलेल्या माहितीनुसार,  कल्याण पंचायत समितीच्या शिक्षण विभागाच्या अंतर्गत येत असलेल्या निळजे जिल्हा परिषदेच्या शाळेत हा संतापजनक प्रकार घडला. प्रभारी मुख्याध्यापक महेंद्र खैरनार (४७) असं या नराधमाचं नाव आहे. महेंद्र खैरनार याने इयत्ता पहिलीत शिकणाऱ्या विद्यार्थिनीसोबत केलेल्या कृत्यानंतर  ग्रामस्थांनी या नराधम शिक्षकाला चोप देऊन मानपाडा पोलिसांच्या स्वाधीन केलं आहे.

कल्याण तालुक्यात निळजे जिल्हा परिषद शाळा ही इयत्ता १ ते ७ वीपर्यंत असून ३ पुरुष शिक्षक तर २ महिला शिक्षका आहेत. या शाळेचे प्रभारी मुख्याध्यापक महेंद्र खैरनार याने इयत्ता पहिलीत शिक्षण घेणाऱ्या एका मुलीशी अश्लिल वर्तन केलं. नंतर तिला त्रास होऊ लागल्याने तिने हा प्रकार तिच्या आईला सांगितला.

आई- वडिलांना हे कळताच त्यांना जबर धक्का बसला. त्यांनी लगेच निळजे गावातील शालेय व्यवस्थापन समितीचे सदस्य तथा शिवसेना उद्धव बाळासाहेब ठाकरे पक्षाचे उपतालुकाप्रमुख ॲड मुकेश भोईर यांच्या कानावर ही गोष्ट घातली. त्यांनी तात्काळ याची गंभीर दखल घेतली आणि कार्यकर्त्यांसह शाळेवर पोहोचले. तिथे जाऊन नराधम मुख्याध्यापक महेंद्र याला बेदम चोप दिला. त्यानंतर त्याला मानपान पोलिसांच्या स्वाधीन केलं  आहे. या प्रकरणी पीडित मुलीच्या कुटुंबीयांच्या तक्रारीवरून मानपाडा पोलिसांनी पोक्सो अंतर्गत गुन्हा दाखल केला असून शिक्षक महेंद्र याला बेड्या ठोकल्या आहेत. या प्रकरणाचा अधिक तपास पोलीस करत आहे.