रेल्वेचा अजब कारभार! 'महालक्ष्मी' एक्स्प्रेसच्या प्रवाशांना बसणार मोठा फटका; प्रवासी संघटनांकडून आंदोलनाचा इशारा

महालक्ष्मी एक्स्प्रेस ही मध्य रेल्वेच्या पुणे विभागातील सर्वाधिक उत्पन्न देणाऱ्या गाड्यांपैकी एक आहे. ही गाडी रोज रात्री ८.५० वाजता कोल्हापूरहून निघते आणि प्रवाशांकडून तिला नेहमीच मोठा प्रतिसाद मिळतो. वर्षभर या गाडीचे तिकीट ‘प्रतीक्षा यादी’ (waiting list) मध्ये असते. अशा परिस्थितीत डबे वाढवण्याऐवजी ते कमी करण्याचा निर्णय अत्यंत संतापजनक असल्याचे प्रवासी संघटनांचे म्हणणे आहे. या रेल्वेला यापूर्वी जादा एलएचबी कोच जोडले होते, ज्यामुळे प्रवाशांना आरामदायी प्रवास मिळत होता. पण आता हा नवीन निर्णय प्रवाशांची गैरसोय करणारा आहे.

कोल्हापूर-सांगली रेल्वे पॅसेंजर असोसिएशनचे सदस्य उदयसिंह निंबाळकर यांनी सांगितले की, “महालक्ष्मी एक्स्प्रेसला दोन डबे वाढवण्याची मागणी असताना, आता तीन आरक्षित डबे कमी करणे अन्यायकारक आहे. हा निर्णय रद्द न झाल्यास तीव्र आंदोलन करावे लागेल.”