Ajit Pawar Funeral : झंझावत कायमचा विसावला! अजितदादा पंचतत्वात विलीन, लाखोंच्या जनसागराचा भावूक निरोप

बारामती, पुणे: राज्याच्या राजकारणातील एक झंझावात आणि बारामतीकरांचे लाडके 'दादा' म्हणजेच उपमुख्यमंत्री अजित पवार यांच्या पार्थिवावर आज दुपारी १२ वाजण्याच्या सुमारास अंत्यसंस्कार करण्यात आले. बारामती येथील विद्या प्रतिष्ठानच्या मैदानावर शासकीय इतमामात त्यांना अखेरची मानवंदना देण्यात आली. लाडक्या नेत्याला निरोप देण्यासाठी बारामतीत जनसागर लोटला होता. प्रत्येक बारामतीकराच्या डोळ्यात आज अश्रू होते, तर आसमंत 'अजितदादा अमर रहे'च्या घोषणांनी दुमदुमून गेला होता. राज्याच्या राजकारणातील मागील चार दशकांपासूनचे एक पर्व आज समाप्त झाले. अजित पवारांच्या निधनाने राजकारणच नव्हे तर सहकार ते  सांस्कृतिक, क्रीडा क्षेत्रातही शोककळा पसरली आहे.