आणखी एका दसरा मेळाव्याची भर... मनोज जरांगे पाटील गरजणार, मेळावा कुठे होणार?

गेली दीड वर्षे मराठा समाजाला ओबीसी प्रवर्गातून आरक्षण मिळावे यासाठी नऊ-नऊ दिवस प्राणांतिक उपोषण करून सत्ताधाऱ्यांना घाम फोडणारे, आपल्या मागण्यांसाठी झगडणारे मनोज जरांगे पाटील यांनी दसरा मेळावा घेण्याचे नियोजन सुरू केले आहे. मराठा समाजाला एकत्रित बोलावून विधानसभेच्या तोंडावर मोठे शक्तिप्रदर्शन करायचे आणि त्यातून विरोधकांना आपली ताकद दाखवून द्यायची, असे जरांगे यांचे नियोजन असल्याचे कळते. गेल्या अनेक दिवसांपासून जरांगे यांनी भाजपविरोधात विशेषत: फडणवीस यांच्याविरोधात उघड उघड भूमिका घेतली आहे. दसरा मेळाव्याच्या माध्यमातून तर त्यांच्या लढाईला नवे रुप प्राप्त होऊ शकते. विधानसभेच्या तोंडावर हा मेळावा होत असल्याने निवडणुकीचा रागरंग बदलण्याची शक्यताही नाकारता येत नाही.

मागील अनेक वर्षांपासून विविध राजकीय पक्षाचे दसरा मेळावे पार पडतात. दिवंगत नेते गोपीनाथ मुंडे यांच्या वारसदार पंकजा मुंडे समर्थकांना दसरा मेळाव्यातून संबोधित करतात. दिवंगत बाळासाहेब ठाकरे यांचे राजकीय वारसदार उद्धव ठाकरे हे शिवाजी पार्कवर दसरा मेळावा आयोजित करतात. शिवसेना फुटीनंतर तर एकनाथ शिंदे यांनीही दसरा मेळाव्यातून शक्तिपर्दर्शन करण्याची संधी सोडली नाही. या सगळ्या दसरा मेळाव्याच्या मांदियाळीत जरांगे यांच्या मेळाव्याची भर पडणार आहे!

शिवसेना ठाकरे गट

पंकजा मुंडे

शिवसेना शिंदे गट

आता-मनोज जरांगे पाटील यांचा दसरा मेळावा