BMC Elections : भाजपच्या सर्वेने शिंदे गटाची धाकधूक वाढली, मुंबई महापालिकेच्या निवडणुकीआधी मोठी उलथापालथ?

आगामी मुंबई महापालिका निवडणुकीच्या पार्श्वभूमीवर भाजपकडून करण्यात आलेल्या अंतर्गत सर्वेक्षणानंतर आता युतीतील जागावाटपाचे गणित पेचात अडकण्याची चिन्हं आहेत. भाजपने आपल्या सर्वेक्षणातून 150 हून अधिक जागांवर लढण्याचे संकेत दिले आहेत. यामुळे शिवसेना (शिंदे गट) अंतर्गत अस्वस्थता वाढली असल्याचे म्हटले जात आहे.

मुंबई महानगरपालिकेत एकूण 227 जागा आहेत. त्यापैकी शिवसेना शिंदे गट 107 जागांवर आपले उमेदवार लढवण्याच्या तयारीत असल्याचे आतापर्यंत संकेत देत आहे. भाजपचे नेते आणि गृहमंत्री अमित शाह यांची शिवसेना शिंदे गटाचे मुख्य नेते एकनाथ शिंदे यांनी मुंबई दौऱ्याच्या वेळी भेट घेतली होती. या बैठकीत शिंदे यांनी आपल्याकडे 107 उमेदवार तयार असल्याचे सांगितले. यामध्ये ठाकरे गटासह काँग्रेस व इतर पक्षांचे नगरसेवकांचा समावेश आहे.

शिवसेना शिंदे गटाने मुंबई महापालिका निवडणुकीसाठीची तयारी सुरू केली आहे. त्यासाठी ठाकरे गटाच्या माजी नगरसेवकांना गळाला लावले. मागील निवडणुकीत विजयी झालेले जवळपास 50 नगरसेवक शिंदे यांनी आपल्या गळाला लावले. त्याशिवाय काँग्रेस आणि इतर पक्षांचेही नगरसेवक आपल्याकडे खेचले आहेत.

भाजपच्या सर्वेक्षणानुसार मुंबईतील जनमत भाजपच्या बाजूने असल्याचे दिसून येत असून, त्यामुळे पक्ष स्वबळावर सत्ता स्थापनेस उत्सुक असल्याचं भाजपमधील सूत्रांकडून समजते. सर्वेक्षणानुसार, भाजपने 150 आणि त्याहून अधिक जागांवर निवडणूक लढवल्यास त्यांना मुंबई महापालिकेवरील स्वबळावर सत्ता स्थापन करण्याची संधी असणार आहे. मात्र, भाजपने 150 जागांवर उमेदवार उभे केले तर शिंदे गट आणि राष्ट्रवादी अजित पवार गटाच्या वाटेला किती जागा येणार हा मोठा प्रश्न निर्माण होणार आहे. मुंबईत अजित पवार गटाची ताकद फार कमी असल्याने अजित पवार गट महायुतीमध्ये कमीत कमी जागांवर निवडणूक लढवण्यास तयार होऊ शकतो. मात्र, शिंदे गटाची मोठी अडचण होणार आहे.