Dombivli: 'तो डायनासोर दिल्लीत जाऊन बसला, पक्षाचे पैसेही खाल्ले' डोंबिवलीमध्ये काँग्रेसमध्ये फुटले फटाके, संजय दत्त यांच्यावर आरोप

आगामी महापालिका निवडणुकीच्या तोंडावर डोंबिवलीमध्ये राजकीय वारे वाहू लागले आहे. शिवसेना शिंदे गट आणि भाजपमध्ये जोरदार पक्षप्रवेश सोहळे सुरू आहे. मात्र, काँग्रेसमध्ये अंतर्गत वाद पेटला आहे. अलीकडेच काँग्रेसच्या माजी नगरसेवकांनी भाजपमध्ये प्रवेश केला. भाजप प्रदेश अध्यक्ष आमदार रवींद्र चव्हाण आणि मंत्री गणेश नाईक यांच्या मार्गदर्शनाखाली भारतीय जनता पार्टीत मा. नगरसेवक नंदु म्हात्रे (काँग्रेस आय.), मा. नगरसेवक हृदयनाथ भोईर (काँग्रेस आय.), मा. नगरसेवक जितेंद्र भोईर (काँग्रेस आय.) आणि मा. नगरसेवक हर्षदा भोईर (काँग्रेस आय.) यांनी प्रवेश केला होता. अनेक माजी नगरसेवक सोडून गेल्यामुळे काँग्रेसमध्ये आता आरोप-प्रत्यारोपाचा सामना रंगला आहे. काँग्रेसचे महाराष्ट्राचे प्रदेश सचिव संतोष केणे यांनी माजी आमदार संजय दत्त यांच्यावर गंभीर आरोप केला आहे.

संतोष केणे यांनी नाव न घेता संजय दत्त यांच्यावर आरोप करत सांगितलं की, 'कल्याणची परिस्थिती एका डायनासोरने गंभीर करून ठेवली आहे. तो डायनासोर दिल्लीत जाऊन बसला आहे. त्यांनी कधीही पक्ष संघटनेवर लक्ष दिलं नाही. ऑल इंडिया काँग्रेस कमिटीचे सदस्य होण्यासाठी लागणारे आठ सदस्य यांच्यासाठीच केवळ त्यांनी आतापर्यंत प्रयत्न केले आहेत या व्यतिरिक्त पक्षासाठी त्यांनी काही केलेलं नाही' अशी टीका केणे यांनी केली.