दुबार पेरणीचे टळेल संकट, या पद्धतीनं तपासा बियाण्यांची उगवण क्षमता Video

आपल्या घरचे किंवा बाजारातून विकत आणलेले बियाणे उगवणक क्षमता तपासण्यासाठी रँडमली 100 दाणे निवडावेत. यानंतर गोणपाटाचा एक चौकोनी तुकडा कापून घ्यावा. त्याला थोडा वेळ पाण्यात भिजवत ठेवावे. यानंतर तो जमिनीवर अंथरून 100 दाणे दहा दहाच्या रांगेत ठेवावेत. दहा दाण्यांच्या 10 रांगा तयार झाल्यानंतर गोणपाटाला प्रत्येक रांगेची एक एक घडी व्यवस्थित घालावी. सर्व दहा घड्या घालून झाल्यानंतर त्याची व्यवस्थित सुरळी तयार होते. या सुरळीला दोन्ही बाजूंनी सुतळीने किंवा दोरीने बांधून घ्यावे ही  सुरळी रांजण किंवा टाकीपासी ठेवावी आणि दररोज दोन वेळा त्यावर पाणी टाकावे. पाच ते सहा दिवसांनी सुरळी उकळून पहावी. 100 दाण्यांपैकी 70 किंवा त्यापेक्षा जास्त दाणे उगवले असल्यास हे बियाणे पेरणी योग्य असल्याचे समजले जाते, असं कृषी सहाय्यक अंजना सोनवलकर यांनी सांगितलं.

बियाण्यांची उगवण क्षमता तपासल्यानंतर आपल्याला बियाण्याच्या दर्जाबाबत माहिती मिळते. 70 टक्के पेक्षा अधिक उगवण क्षमता असल्यानंतरच शेतकऱ्यांना बियाणे पेरणीचा सल्ला कृषी विभागाकडून देण्यात येतो. बियाण्यांची उगवण क्षमता तपासल्यानंतर शेतकऱ्यांचं होणारं संभाव्य नुकसान टळतं आणि दुबार पेरणीचे संकट देखील निर्माण होत नाही. त्यामुळे शेतकऱ्यांनी आपलं संभाव्य नुकसान टाळण्यासाठी बियाण्यांची उगवण क्षमता आवश्यक तपासावी, असे आवाहन कृषी विभागाने केले आहे.