जरांगेंचं उपोषण सुरू असतानाच लक्ष्मण हाके आज करणार मोठी घोषणा, अंतरवालीत घडामोडींना वेग

ओबीसी नेते लक्ष्मण हाके आणि नवनाथ वाघमारे आजपासून अंतरवाली सराटीच्या वेशीवर म्हणजे वडी गोद्रीत उपोषण करणार आहेत. सकाळी 10 वाजता पत्रकार परिषद घेऊन हाके उपोषणाबाबत घोषणा करणार आहेत.

सगे सोयरे शब्दाची अमंलबजावणी करू नये, बोगस नोंदीद्वारे देण्यात आलेले कुणबी प्रमाणपत्र तात्काळ रद्द करा अशा विविध मागण्यांसह हाके आणि नवनाथ वाघमारे उपोषण करणार आहेत.  अंतरवालीच्या वेशीवर यापूर्वी मंगेश ससाणे यांचंही उपोषण सुरु आहे. त्यामुळे आता मराठा, ओबीसी संघर्ष आणखी पेटण्याची शक्यता आहे.

दुसरीकडे आज मनोज जरांगे पाटील यांच्या उपोषणाचा तिसरा दिवस आहे. मराठा समाजाला ओबीसीमधून आरक्षण मिळावं या मागणीसाठी मनोज जरांगे पाटील सहव्यांदा उपोषणाला बसले आहेत. दोन चार दिवसात सरकारनं आमचा प्रश्न मार्गी लावावा. नसता फडणवीसांचे सगळे गणितं फेल करणार. मग आमच्या नावानं बोंबलत बसू नका, असा इशाराही मनोज जरांगे पाटील यांनी यावेळी राज्य सरकारला दिला आहे. अंबडचे तहसीलदार सोडता अद्याप सरकारच्या एकाही प्रतिनिधीने जरांगे पाटील यांची भेट घेतलेली नाहीये.