लालबागच्या राजाचं दर्शन घ्यायचंय? मग कोल्हापुरात या की..! 12 वर्षांची अनोखी परंपरा, VIDEO

14 फूट उंच असलेली मूर्ती लालबाग इथे असणाऱ्या गणेश कार्यशाळेत तयार केली जाते आणि तिथून ही मूर्ती कोल्हापुरात मोठ्या थाटामाटात आणली जाते. ढोल-ताशा पथक, विद्युत रोषणाईत गणेशमूर्ती शहरात आणण्यात येते आणि गणेश चतुर्थीला मूर्ती मंडपात विराजमान होते. या बाप्पाला कोल्हापूरकरांनी कोल्हापूरचा राजा अशी उपाधी दिली आहे. कोल्हापूरचा राजा गोल सर्कल मित्र मंडळाचे सदस्य गणेश पाटील यांनी याबाबत माहिती दिली.

यंदादेखील गणेशोत्सवात म्हणजेच 7 सप्टेंबरला कोल्हापूरच्या राजाची विधिवत प्राणप्रतिष्ठा झाली. गणेशोत्सवादरम्यान केवळ कोल्हापुरातील नव्हे तर संपूर्ण पश्चिम महाराष्ट्रातून भाविक येथे दर्शन आणि नवसासाठी येतात. हा नवसाचा गणपती म्हणूनही प्रसिद्ध आहे. या गणपतीचे दर्शन घेतल्याने सर्व मनोकामना पूर्ण होतात, असा भाविकांचा विश्वास आहे.