एका पॉझिटिव्ह महिलेची गोष्ट, स्वत: बाधित असूनही बनल्या HIV ग्रस्तांच्या आधारवड, Video

कोल्हापूर : समाजाने समाजातीलच एखाद्या घटकाला वाळीत टाकले, तर त्या घटकाचे जगणेच अवघड होऊन जाते. मात्र त्याही परिस्थितीत आपल्या सारख्याच घटकांचा विचार करून जिद्दीने झुंजत लढत कोल्हापुरात एक महिला उभी राहिली. स्वतःशी आणि समाजातील विचारांशी लढा देत समाजातील निराधारांची ती आधारवड बनली. स्वतःही एचआयव्ही या दुर्धर आजाराने ग्रस्त असून देखील ती अशाच गरजू आणि निराधार एचआयव्ही बाधितांची ती आधारवड बनली आहे. त्याच कोल्हापुरातील कर्तृत्ववान अशा सुषमा बटकडली ताईंची ही कहाणी आहे.

खरंतर एचआयव्ही या आजाराचे नावही उघडपणे अजून देखील घेतले जात नाही. त्यात अशा दुर्धर आजाराने ग्रस्त असणाऱ्या बाधितांचे आयुष्य बऱ्याचदा एकाकीच असते. सुषमा बटकडली या त्यापैकीच एक आहेत. सध्या करवीर तालुक्यातील दऱ्याचे वडगाव या ठिकाणी वास्तव्यास असणाऱ्या सुषमा या मूळच्या कर्नाटकातील आहेत. त्यांनी सुरू केलेल्या जाणीव फाउंडेशन या संस्थेच्या माध्यमातून त्या अनेक एचआयव्ही बाधितांसाठी कार्य करत आहेत. नुकतीच त्यांनी वयाची पर्वा न करता शिवाजी विद्यापीठातून मास्टर ऑफ सोशल वर्कची पदवीही मिळवली आहे.

एकट्या पडलेल्या सुषमा ताईंना समाजाचे काटे अजूनच जास्त टोचू लागले. इतके की कित्येकदा आयुष्य संपवून टाकण्याचे विचार देखील त्यांच्या मनी येऊन गेले. मात्र या परिस्थितीत देखील त्यांनी लढायचा निर्धार केला. आपल्यावर जशी परिस्थिती आली आहे तशीच समाजातील अशा घटकांवर आली असणार हा विचार त्यांनी केला. अशा निराधार आणि गरजू लोकांच्या साठीच आपला आयुष्य घालवायचं, असं ठरवून त्या 2010 साली कर्नाटकातून कोल्हापुरात आल्या.

दरम्यान, कोल्हापुरातील लक्ष्मीपुरी मधील रिलायन्स मॉलच्या पाठीमागे महानगरपालिकेच्या एका गाळ्यात या जाणीव फौंडेशनचे कार्यालय आहे. समाजातील निराधार आणि गरजू एचआयव्ही बाधितांना सहाय्य करणाऱ्या या संस्थेला सध्या सढळ हाताने मदत करून सुषमा ताईंचे हात बळकट करण्याची गरज आहे.